Grupo Pro Bon Enseñansa (GBPE) ta un grupo di profesional riba tereno di enseñansa cu ta contribui na desaroyo di Aruba en general y su enseñansa en particular. Nos ta consisti di miembro di Fundacion Lanta Papiamento (FLP) y Foundation for Social Research on Dutch Caribbean and the Region (CaribResearch).
Nos ta boga y ta traha pa:1. Un maneho di enseñansa y di idioma den enseñansa integral, sistemico y balansa na Aruba, basa riba dato di investigacion die situacion linguistico di Aruba, segun ciencia di enseñansa, y dirigi riba pueblo di Aruba, respetando e derechonan di e pueblo aki. Enseñansa y su maneho ta y mester keda den nos mes man: un derecho cu nos tin desde aña 1954, ora cu Aruba a bira autonomo pa loke ta su enseñansa. Tur estudio, nacional y internacional, tabata y ta mustra den e mesun direccion: mester bin un maneho di enseñansa cu ta na fabor di e pueblo Arubiano. ‘Na fabor’ ta nifica cu un grupo hopi mas grandi di nos pueblo ta logra un diploma superior na loke e cifranan abou di nivel di educacion di cuerpo laboral na Aruba keto bay ta mustra. E autonomia aki ta nifica tambe cu enseñansa di Aruba for di 1954 ta cay bou di Inspectoria di Aruba. E contenido di SAM y PEN2030 ta aproba y GPBE ta indica cu ta IPA y DEA mester guia e implementacion di innovacion den e scolnan na Aruba cu control di Inspectoria di Aruba. Un otro pais no por haci esey pa nos.2. Implementacion di e Scol Arubano Multilingual y Plan Eduacion Nacional 2030, respetando cu esaki alabes e cambio di ley di 2003 (‘Wetswijziging t.b.v. introductie Papiamento als onderwijsinstructietaal in het kleuter- en basisonderwijs’). Departamento di Enseñansa (DEA) a diseña innovacion di enseñansa di Aruba den curso di tempo, pa medio di diferente nota di maneho y curiculo cu ta funda riba investigacion basa riba realidad di Aruba. Mester haci uzo di e notanan aki y inspira, motiva y activa tur actor pa ehecuta e vision coherente pa un enseñansa emancipatorio, desaroyado, constructivo y cu sentido, basa riba idioma materno di mayoria di e alumnonan di Aruba. Actor ta tambe e mayornan, comunidad, e directivanan di scol, sindicato, e gremionan, cu directa- y indirectamente ta forma e hende cu nos comunidad mester den siglo 21. A crea Proyecto Scol Multilingual (PSML) den forma di tres scol piloto, a base di un cambio di ley di introduccion di Papiamento, aproba pa Gobernador Fredis Refunjol dia 18 di december 2003. Entretanto PSML a pasa su añanan piloto cu hopi bon resultado, segun e prome relato di e efecto di e programa multilingal (2016). E scolnan secundario a registra generalmente bon prestacion di e alumnonan di PSML, notando alabes e actitud positivo pa siña y nan motivacion pa siña, algo poco comun den nos enseñansa. Aruba ta mas cu cla pa sigui cu e innovacion aki. Estudio a mustra cu tanto mayor como docente ta na fabor di un scol basico cu Papiamento como idioma di instruccion y cu e otro idiomanan como materia. 3. Cumpli cu e principio fundamental cu definicion, maneho, supervision y mehoracion di enseñansa di Aruba ta un prerogativa y deber local y mester ta den nos man. Nos propioexpertonan ta apto, prepara y tin amplio experiencia relevante pa dirigi y monitorea enseñansa na Aruba.4. Preparacion y recapacitacion di nos maestronan tuma luga na Aruba mes, cu nos propio expertonan y pa medio di nos propio instituto local IPA, cu ta un instituto experto ya pa hopi aña caba. IPA tin hopi experiencia cu preparacion di maestro na nivel di Bachelor pa enseñansa preparatorio, enseñansa basico y enseñansa secundario. E tin experiencia tambe cu ‘blended learning’, enseñansa semi-digital den cooperacion cu University of Curaçao pa diferente estudio na nivel di Master. IPA tin tambe e experticio local y conocemento necesario di e contexto cultural y social y por cumpli cu puntonan di salida di epistemologia, e ciencia di conocemento. No ta corecto pa pone formacion di maestro/docente den man di instituto aheno cu no conoce cultura, historia ni enseñansa di Aruba. IPA, acredita eprome biaha na 2012 y e di dos biaha na 2018, mester sigui ricibi tur apoyo necesario y aprecio pa sigui cumpli cu e tarea importante aki.5. Digitalisacion bira un di e medionan mas importante den enseñansa, pero semper a base di e principio cu e maestro ta keda guia e proceso di siñamento y ta e alma creativo den enseñansa. 6. Crea un plataforma cu ta haci uzo di conocemento, experienciay pasion di experto local, incluso persona pensiona, cu ta y tabata envolvi den creacion di, entre otro, PSML, SAM y PEN.
Grupo Pro Bon Enseñansa ta pidi un combersacion cu Minister Presidente y cu Minister di Enseñansa di Aruba pa dialoga tocante e puntonan aki y pa crea tur garantia cu ta cumpli cu e 6 puntonan di lansa menciona akiriba.
Fundacion Lanta Papiamento
CaribResearch, seccion Aruba
