Parlamentario di fraccion di MFK Charles Cooper a manda un carta oficial Minister di Finansas, señor K. Gijsbertha. E topico di e carta aki ta riba Intento maligno di CBCS relaciona cu baranan di oro di Corsou. E carta dirigi na e mandatario ta bisa lo sigiente.
Honorabel Minister Gijsbertha, For di aña 1971, florin Antiano ta hancra na doller Mericano (como moneda di nos partner comercial mas importante) pa asina garantisa comercio na Corsou y nos sobrevivencia. Base di esaki tabata y ta nos reserva di oro y di divisa. Como tal gobiernonan di turno pa medio di “Centrale Bank van Curaçao en St. Maarten (CBCS) a hiba un politica pa garantisa cu semper Pais ta dispone di suficiente reserva di oro y divisa y asina garantisa stabilidad di nos florin.
Fraccion di MFK a tuma nota ultimamente di algun desaroyo cu ta motibo di gran preocupacion pa nos. Di acuerdo cu e presupuesto di CBCS y algun publicacion den prensa local nan ta proyecta cu pa e proximo añanan CBCS lo opera cu perdidanan cuantioso. No solamente e perdidanan aki tin consecuencia pa operacion di CBCS, pero esaki tambe tin consecuencia pa pais.
Di acuerdo cu articulonan 34 y 35 di e “Bankstatuut”, e gobiernonan di Corsou y Sint Maarten ta obliga pa cubri e perdidanan aki inmediatamente. Recientemente gobierno di Corsou mester a fia 171 miyon florin di Hulanda pa evita un desaster financiero y social a consecuencia di e problemanan cu a surgi na Girobank. Awor atrobe pais ta ser confronta cu otro desafio a consecuencia di actonan di CBCS.
Miéntras esnan responsabel no ta ser yamá pa responsabilisá nan mes, CBCS a anunsiá un programa di retiro obligatorio kaminda hopi kas di famia inosente tin ku karga e fayonan di gerensia i su Hunta di Komisario di CBCS.
Pa cubri e fayonan aki, CBCS ta propone pa aumenta e “License Fee” cu banconan comercial ta cobra pa gobierno cada bes cu tin un transaccion cu estranheria. Esaki tin como consecuencia cu bida lo bira mas caro den e temponan dificil cu e pueblo ya ta pasando den dje. Pa corona obra, CBCS awor riba instruccion di Hunta di Comisario a acerca IMF cu e encargo pa un conseho con nan por bende nos reserva di oro cu ta forma base di confiansa y stabilidad di nos florin.
Haciendo uzo di e derecho constitucional cu ley ta duna mi pa medio di articulo 96 di Reglamento di Orden y como representante di mi pueblo mi ta haci algun pregunta na Minister di Finansa;
1.Minister por confirma pa Parlamento cu di acuerdo cu articulo 24 insiso 2 di e “Bankstatuut” cu Minister ta cumpli cu ley y reuni regularmente cu presidente di CBCS?
2.Minister por informa Parlamento di contenido di e reunionnan aki?
3.Minister por informa Parlamento si ta berdad cu CBCS por lo menos te cu aña 2024 ta proyecta perdidanan cuantioso?
4.Si esaki ta berdad minister por splica Parlamento dicon contrario na añanan 2008 i 2009, cual tabata periodonan di crisis, di interes abou y cu un reserva di divisa mas abou cu esun di 2020, CBCS bou di e maneho di gerencia di e tempo ei si a haci ganashi?
5.Minister por informa Parlamento si ta berdad CBCS ta den consulta cu IMF pa yega na un formula pa bende nos reserva di oro?
6.Minister ta di akuerdo ku un diskushon asina den un tempu di krísis i di pèrdidanan di CBCS lo manda un señal robes pa merkado y komunidat (tafel zilver verkopen)?
7.Minister por informa parlamento cu CBCS, contrario na e maneho monetario cu e ta hibando awor, ta compromete pa garantisa stabilidad di nos florin di acuerdo cu ley?
8.Mirando e efectonan den mercado pero tambe den comunidad, kico ta e pasonan cu minister ta pensa di tuma pa evita cu CBCS por haci mal uzo di su independencia y bende nos reservanan di oro, sin consulta cu gobierno?
Fraccion di MFK ta spera cu Minister Gijsbertha tuma bon nota di e preocupacion di Fraccion di MFK y di ciudadanonan di Corsou y cu minister contesta e preguntanan den e tempo stipula pa nos Reglamento di Orden y tambe e acuerdo entre gobierno y Parlamento di Corsou.
Charles Cooper Parlamentario pa Fraccion di MFK a entrega presidente di parlamento di Corsou haciendo uzo di articulo 96 di Reglamento di orden di Parlamento, ta pidi presidente di parlamento Señora A. Pauletta pa dirigi e carta adhunto na Minister di Finansas, señor K. Gijsbertha.
1 comment