Un copia di e carta unda cu a manda Ernst & Young haci un investigación den Departamento di Infrastructura y Planificacion no ta mustra nada den direccion di un persecucion politico contra Benny Sevinger.
Algun dia atras a publica un articulo den cual ta menciona cu ta trata di un procedura normal di cualkier minister nobo na momento cu e tuma un cartera. E ta laga haci un doorlichting di e departamento. Den e caso aki e carta firma pa Otmar Oduber, cu ta papia di un investigacion den DIP, e ta menciona cu esaki ta aproba door di Gobierno di Aruba.
E investigacion aki a wordo pidi den cuadro di un resolucion di Parlamento pa haya transparencia y integridad den e procesonan gubernamental. Den e carta ta menciona cu ta bay aki pa screening di DIP di proceduranan hiba den e periodo di prome di october, 2016, te cu 31 di december, 2019. Manera por mira, esaki ta inclui e periodo cu Otmar Oduber tabata Minister di e Gobierno cu su partido POR tabata sostene Gobierno lidera pa Evelyn Wever Croes.
Pues e hecho ariba menciona ta demostra cu no ta trata aki di persecucion sino ta pa haci un analisis di proceduranan hiba. Analisis di terenonan di Gobierno otorga na ciudadanonan; procedura di terenonan otorga cu metanan comercial y otorgamento of benta di propiedadnan na cierto tereno specifico, Seroe Colorado. Y nada mas
Manera menciona, e doorlichting di un departamento ta algo cu a yega di sosode den pasado caba door di mandatarionan anterior ora cu nan a bay ocupa e puesto nobo. Esaki a sosode ora cu Benny Sevinger a bira Minister, el a haci un doorlichting di maneho di Marisol Lopez Tromp, tempo cu e tabata Minister bou di gobernacion di MEP.
