Caro Caro Carolina “Carolyn” Chicas Gaiteras “DIVAS”

Na anja 1990 Carolyn Kelly a inicia su carera como cantante den Chicas Gaiteras, na un edad joven di apenas 16 aña. Na comienso Carolyn tabata un poko timida, pero sigur determina pa triunfa y realisa su soño di forma parti di Chicas Gaiteras y bira un di e mihor voznan y interprete cu un estilo unico cu Aruba por a conose y disfruta di dje

Apesar di un edad hoben Carolyn den su prome salida a sa graba tres (3) cancion titula, Niño Chiquito, Inolvidabel Amigo, y e Inolvidabel tema titula “WELA”, e tempo ey riba cassette.

Na aña 1992 Marion Maduro como compositora di e cantica “ WELA” a disidi di graba e cancion un biaha mas pero na e ocashion aki lo ta riba un compact disk, pa asina sigura e legado y vivencia digital di “Wela” y naturalmente un biaha mas den e voz unico di Carolyn Kelly

Carolyn Kelly a sa na pone su stempel y laga pa nos un legado den e mundo musical di fin di aña door di graba no mas cu 14 cantica pa Chicas Gaiteras cu a hasie un di e voz nan cu ta identifica Chicas Gaiteras.

Chicas Gaiteras ta conoci pa su temanan cu mensaje profundo cu Carolyn Kelly a sa na transmiti manera un Diva. Carolyn su interpretashon nan hopi biaha a causa lagrima nan den e publico pero tambe den e  propio agrupashon.

Carolyn cu su voz a sa na interpreta cancionnan cu emoshonnan cu no por wordo describi cu palabra. Como celebrashon di e 25 aña di su Manager Marion Maduro e la sa na contribui cu su voz na e realisashon di un production nobo di 7 cantica.

Apesar cu Chicas Gaiteras a despedi oficialmente di farandula cu un concierto cu hopi ta cataloga como un cierre di broche di oro, Carolyn a keda activo y fiel na Marion como compositora pa produccion nan nobo. Den cuadro di esaki Carolyn a contribui cu su voz tanto como solista y corista na e Proyecto titula “Pa henter aña”.

Su ultimo grabashon como solista tabata e cantica y videoclip titula “Cancer” dedica na tur cu ta sufri di e malesa feroz aki cu hopi vez ta jega na porta sin avisa.

Carolyn sin duda tabata un integrante jena di hopi amor, dedicashon y pashon pa Chicas Gaiteras.

Carolyn a recorda su temporada den Chicas cu hopi nostalgia, e la Soña cu un futuro den chicas pero e la biba semper E DIA, E MOMENTO Y E AWO di Chicas Gaiteras.

Tin Hopi anectoda pa recorda, pero loke semper lo keda den nos mente ta e energia cu Carolyn a sa na transmiti y e gana cu e tin pa biba Bida.

Sin duda nos lo haña falta di Carolyn su influencia positivo den nos agrupashon. Pa es motibo aki Chicas Gaiteras lo duna un mini concierto Diabierna 9 di Juni 2023 na Royal Funeral Home pa celebra y honra nos Carolyn su carrera musical.

Nos di Chicas Gaiteras ta invita tur fanaticonan, amigo y conocirnan pa bin celebra e Bida di nos “Carol Carol Carolina Kelly ”. Gone to Soon, But never Forgotten.