Carlos Lopez Natera miembro di M21 ta trese su punto di bista kiko ta objetivo di un presupuesto di un gobièrnu. Segun Sr. Carlos Lopez Natera, Platon ta bisa den su buki “La Republica” ku e ser humano mester biba den un komunidat; espesífikamente, den un sosiedat organisá pa por kombibí i sobrebibí ku otro sernan humano. Pa por biba den un komunidat, esaki mester ta organisá i mester tin un direkshon, i ta den e área aki polítika i polítikonan ta drenta pa duna bida na e siudatnan di un estado. Tambe Platon a bisa ku un polítiko mester ta hustu den nan desishonnan.
Biniendo bek den nos tempu, polítika aktual ta basa riba dos dimenshon: legislá i invertí. Esnan na poder tin e kapasidat i deber di legislá nos akshonnan, esaki ta parti di nan responsabilidat básiko i komo tal nan mester hasi esaki ku igualdat, basa riba estado di derechi, ku leinan i normanan, semper ku rèspèt pa ku derechinan humano. E otro área hopi importante i kisas kritiko i delikado ta “atministrashon públiko” i spesífikamente loke tin di aber ku presupuesto, no solamente pa determiná gastunan pero tambe pa garantisá e bon trabou -konhuntamente- di tur servisionan di gobièrnu den nan ehekushonnan, pues den nan “invershon públiko”.
Un presupuesto komo instrumento finansiero i ekonómiko, ta e base di kualke akshon di gobièrnu den su funshonamentu diario i den e desaroyo di e diferente plannan di akshon polítiko. Presupuesto ta un hèrmènt di funshonamentu atministrativo ku ta permití un gobièrnu aktua di un forma planifiká, ophetivo i rashonal. Ta importante pa menshoná ku presupuesto NO ta polítika; polítika ta hasi uso di presupuesto pa ehekushon di plannan. Ta importante pa traha un presupuesto ku un vishon amplio i kla pa e por ta efektivo den kualke situashon di akuerdonan polítiko.
Un presupuesto mester ta basa riba un prinsipio di planifikashon ku ta inkluí: rashonalidat, previshon, universalidat, unidat, kontinuidat. E aspektonan aki ta fundamental pa un presupuesto por ta efektivo. For di nan ta bini e proseso di: formulashon, diskushon i aprobashon, ehekushon i kontrol i evaluashon di resultadonan.
For di esaki nos por dedusí ku un presupuesto públiko ta un plan di akshon di gran importansia; e ta reflehá un parti fundamental di e polítika riba tur tereno. E ta trese dilanti prioridatnan i ophetivonan di e gobièrnu. Un presupuesto ta mustra kon gobièrnu ta saka rekursonan for di komunidat i kon esakinan ta wòrdu re-distribuí den e komunidat su nesesidatnan..
Un presupuesto mester ta tambe, un hèrmènt adekuá di gobièrnu. Pa esaki mester satisfasé dos kondishonnan fundamental: generá insentivo pa ku e akshonnan individual i kolektivo i produsí resultadonan positivo i ku impakto.
Awor mi preguntanan ta: basa riba loke un formulashon presupuestario mester ta i mester tin den dje, esun presentá pa Kolegio Ehekutivo pa aña 2022 ta algu ku nos komunidat di Boneiru por biba kun’é? E presupuesto 2022 ta un refleho di nos realidat i un vishon di loke nos ke i mester pa e luna nan ku ta bini? Nos dolónan lo keda aliviá ku e presupuesto aki? Nos ta sinti nos mes representá den loke e presupuesto 2022 su kontenido ta? E presupuesto 2022 ta mustra klaridat, igualdat, partisipashon di pueblo, ekilibrio i klaridat den su formulashon? Boneiru ta bai ta bon para basa riba e presupuesto 2022?
E preguntanan aki i hopi mas, ta dudanan ku nos komo siudadano di Boneiru, tin òf lo por tin den un futuro serkano i p’esei mi ta sinti ku komunidat mester ta na altura di loke ta bai sosodé ku maneho di nos gobièrnu pa loke ta trata finansa: kòrda ku na final di dia ta gobièrnu ta bai saka nos sèn i nan deber ta pa nan re-distribuí esaki di un forma bon planifiká na benefisio di nos komunidat i ku kontrol.
Mirando kon e kos ta i kon ta kanando awor aki mi ta kere ku a yega e ora pa E DIFERENSIA!
