Dia pa dia nos isla ta bira mas sushi
Kada dia ta bira mas komun pa mira kon lamentablemente nos ta bayendo atras komo siudadano i kon nos rèspèt i berdadero stimashon pa Boneiru kada dia ta bira ménos. Si pa algu Boneiru ta konosí den region i na nivel internashonal ta pa su bunitesa, su naturalesa bon mantené, su laman kristalino i yen di bida. Pero loke serka mayoria di turista tabata destaká mas tantu i di kua nos tabata sinti nos mes orguyoso tabata kon limpi nos isla tabata. No tabata muchu aña pasá ku a kuminsá haña sushi bentá kantu di kaminda, mira sakunan tirá den mondi òf topa ku kosnan bieu depositá kantu di kaminda. Esaki ántes tabata algu kasi imposibel. Ta tristu, pero e bunita bista ei no tei mas, pokopoko sushi a kuminsá dominá tur kaminda i e bista mahos aki a bira algu komun. Realidat ta ku komo siudadano nos ta pèrdiendo nos interes i nos ta bandonando nos responsabilidat di mantené Boneiru bunita i limpi manera ántes, manera mester ta. Nos ta lubidá riba un di nos debernan komo suidadano ku ta: konservá i mantené nos medio ambiente.
Ken ta responsabel?
Ta tristu pa mira kon nos barionan ta deteriorá, kon nos kayanan ta bai atras i kamindanan pa bai kunuku ta pa nan kuenta. Ta tristu di mira lugánan yen di sushi i kosnan bieu bentá, no papia mes di lugánan di interes turístiko manera esun riba e potrèt: Seru Largu. Pero awor e pregunta kardinal ta: ken ta responsabel pa e situashon akí? Tin hende ku ta bisa: esaki ta responsabilidat di e kompania di limpiesa Selibon i nan tin sierto rason, pasobra nos kompania di limpiesa ta sòru pa kolektá tur sushi, pero nos no por lubidá ku aunke nan ta hasi esaki di un forma strukturá i ku planifikashon, nan no por hasié nan so. Tin hende ku ta bisa ku ta gobièrnu di Boneiru ta responsabel pa e situashon penoso akí i nan tambe tin sierto rason, pasobra nos gobièrnu mester sòru pa promové ambiente sano, limpi i adekuá pa nos siudadanonan por funshoná liber i nan mester sòru tambe pa tin kontrol riba iregularidatnan i aktonan kontra lei.
Deber di kada suidadano
Pero nan so tampoko no por hèndel. Un otro grupo di hende, mi mes ta un di nan, ta pensa ku responsabilidat pa e situashon akí ta básikamente i prinsipalmente di nos komo siudadano. Nos mester hasi uso di nos sentido komun i di nos konsenshi i pèrkurá pa e lugá kaminda nos ta biba, kaminda nos yunan ta hunga, kaminda nos ta kore rònt i disfrutá di bunita bistanan, por ta un lugá limpi i na òrdu. Akí mi ta bolbe bisa: esaki ta un deber di kada suidadano! Nos tur ku ta biba akinan mester sòru pa evitá di tira sushi kaminda no ta pèrmití, gobièrnu mester sòru pa kontrolá esaki i apliká lei si ta nesesario i nos kompania di limpiesa mester hasi nan trabou manera mester ta ku organisashon i planifikashon. Esaki ta un trabou den ekipo, pero ku ta kuminsá ku nos. Di e forma aki nos por garantisá ku nos dushi Boneiru por ta e bunita lugá manera ántes atrobe.
Ban kuida nos dushi isla
Ta na hopi sitio na Bonaire aktualmente e situashon di limpiesa i higiena ta penibel, pero na Seru Largu spesífiko e situashon a bira hopi desagradabel i delikado, es mas: e situashon di Seru Largu ta un bèrgwensa pa nos tur. Un imágen masha mahos na un di e lugánan mas bunita i turístiko di Boneiru; sushi plamá tur kaminda i hasta muebelnan bieu bentá. Ta ora pa nos hasi uso di nos sentido komun, apelá riba nos konsenshi i demostrá nos berdadero stimashon pa nos lugá, ban bira mas síviko i ban kuida nos dushi isla!