-Diamars anochi a tuma lugar den “Arikok”-ballroom di Hyatt Place Aruba Airport, e prome congreso medico organiza pa Caribbean Arthritis Foundation. Durante di e anochi aki e veld di cuido a haya un oportunidad unico pa expande nan conocimento riba tereno di artritis, door cu prof.dr. Michael Nurmohamed, reumatologo na VUmc y Reade, como orador principal a duna un presentacion riba e topico “Cardiovasculair Risico & Management bij Reumatoïde Artritis”. E evento aki a wordo acredita na Hulanda cu oficialmente lo percura pa muy en particular specialista, dokter y boticario nan lo ricibi puntonan den cuadra di educacion permanente.
Den presencia di varios director di instancianan medico, pero tambe 110 medico, e anochi interesante a wordo inicia door di Dr. Rashidi Rellum, Aruba su prome reumatologo desde 2019 y un orador pa e anochi aki. Den su presentacion Dr. Rellum a splica brevemente con su persona y su colega nobo desde 2022, esta Dr. Jessica van Nies, lo percura pa mehora e cuido riba tereno di artritis for di nan policlinica di reumatologia na Sasaki, ya cu mientras tanto nan a haya bista amplio di cuanto patient aki na Aruba ta sufri di un di varios forma di artritis cu ta existi.
Prof. dr. Michael Nurmohamed a presenta informacion clave y mas recien, a base di varios estudio nan haci hunto cu otro coleganan profesor na Hulanda, riba tereno di artritis. E tema principal tabata e riesgo y maneho cardiovascular di artritis reumatoide. Un persona cu wordo diagnostica cu artritis reumatoide, durante di su bida tin un chens mas grandi pa desaroya retonan cardiovascular. Esaki ta un di e motibonan principal pa kiko Caribbean Arthritis Foundation ta enfoca riba e “early diagnosis awareness program”. Antes hopi persona cu artritis tabata tin un chens grandi pa desaroya joints desforma durante nan bida, pero door di remedinan sofistica, esaki ta wordo limita bastante awendia, pero bou condicion cu un persona ricibi tratamento na ora. Pesey e programa di consienticacion aki.
Un di e momentonan culminante tabata ora cu dos invitado special, esta Dr. Sandro Waterloo y Dr. Karina Kelly, a wordo sorprendi cu un reconocimento special for di man di e Presidente di Caribbean Arthritis Foundation, esta. Sr. Francisco di Mey. E reconocimento special ta pa tur trabou cu nan a desplega prome cu Aruba a conoce su prome reumatologonan.
Un danki special ta bai na e Nationale Vereniging ReumaZorg Nederland, cu a haci e congreso medico aki posibel.
Pa mas informacion, libremente bishita e website: www.cafaruba.org of FaceBook Caribbean Arthritis Foundation.
