Loke ta hala atencion di hopi den e temporada aki di e pandemia di COVID ta e cantidad di fayecidonan. Sinembargo no por bisa cu e cifranan ta extremedamente halto compara cu otro añanan. Loke si por bisa cu e cantidad di personanan fayeci, den un luna di augustus, a surpasa e cifra di e ultimo cinco añanan.
Na juli ultimo Aruba a registra un total di 63 persona cu a fayece. Si bay wak e cifranan di 2015 te cu 2020, na juli, 2018 tabatin e cifra mas halto di morto cu tabata 65. Aña pasa tabatin 47 morto den luna di juli.
E luna aki tabata tin e pensamento cu esaki ta hopi. Tabatin un dia den e luna aki cu por a lesa 19 anuncio di sea fayecimento of gradicimento. Haciendo un analisis por nota cu riba e fechanan 7 y 8 tabatin cinco caso di fayecimento cada un. Y tin mas fecha riba cual tabatin 4 fayecimento pa dia.
Pero loke si por constata cu ya caba e luna aki a kibra e record di fayecidonan den luna di augustus di e ultimo cinco añanan. Te awe cu ta 25 di augustus, faltando 6 dia mas pa luna finalisa, tin registra 70 fayecimento (di esnan cu a drenta caba pa anuncio. Aña pasa den luna di augustus (mescos cu na augustus 2017) tabatin 63 fayecido. Na augustus 2015 tabatin e cifra mas abou pa loke ta luna di augustus cu 55 caso registra. Pues falta 10 fayecimento pa kibra e record general di fayecidonan den un luna.
E record, di tur e lunanan di aña, tabata na mei, 2016 ora cu a registra 80 fayecido den e luna en cuestion.
Cifranan di Oficina Central di Estadistica ta mustra cu for di 2015 te cu 2020 e cantidad di mortonan annual tabata respectivamente: 679, 781, 707, 717, 665 y 743 aña pasa. E total di fayecidonan den e cinco añanan aki tabata 4292 persona, y mayoria (1262) tabata den categoria di 75 pa 84 aña.
Awe Departamento di Salubrid Publico a saca un boletin den cual ta para cu e cantidad di personanan cu a muri di COVID desde prome di Juli te cu awo ta 25, di cual solamente 4 ta persona cu a haya un of ambos dosis di e vacuna. E aña’ki tin un total di 132 persona cu a fayece di COVID, di cual 129 ta residente di Aruba.
Cantidad di morto pa un luna di augustus a surpasa cifranan di ultimo cinco añanan
