Drumimento ta un componente vital, hopi biaha neglisha, di un persona su salud y bienestar general. Drumi ta importante paso e ta e momento cu nos curpa ta recupera y haya energia pa un otro dia. Suficiente descanso y di bon calidad ademas ta yuda preveni subimento di peso, problema di curason y ta contribui pa recupera mas lihe despues di un malesa.
Durante soño bo sistema inmunologico ta produci quimiconan cu ta yuda combati infeccion, inflamacion y malesa. Si e curpa no ta haya suficiente soño e ta stroba e produccion di e quimiconan protectivo aki. Specialmente den e temporada aki di COVID-19 ta hopi importante pa bo percura pa haya suficiente ora di soño pa bo sistema inmunologico ta fuerte y bon prepara pa si COVID-19 bati na bo porta.
Tin diferente estudio haci riba e cantidad di ora cu un persona mester drumi pa dia: pa un adulto di 65+ esaki ta 7-8 ora, pa un adulto di 18-65 aña entre 7-9 ora, pa muchanan di edad di 14-17 aña esaki ta 8-10 ora y pa muchanan di 6-13 aña e ta 9-11 ora.
Promove un bon soño door di haci actividad pa bo curpa relaha y asina prepara su mes pa bay drumi. Algun actividad cu ta yuda promove drumimento ta por ehempel dal un baño lauw, lesa un buki, medita, stretching of haci un sesion leve di yoga. Durante dia caba bo por prepara bo curpa pa drumi bon anochi. Esaki bo por haci door di ta mas activo durante dia na trabou y na cas y den bo oranan liber. Algun actividad cu bo por haci ta cana/move mas na trabou y na cas, haci 30 minuut of mas di deporte of otro actividad fisico manera cana of hike den naturalesa, landa, traha den cura.
Un otro manera pa mehora e calidad y cantidad di bo soño ta pa drumi y lanta na mesun ora tur dia hasta den weekend.
Tin algun factor cu por stroba bo di drumi y haya e sosiego necesario pa mantencion di nos salud. Esakinan ta entre otro:
Cafeina (p.e. coffie/thee), e cafeina ta keda 6-8 ora den bo sistema y por stroba bo di pega soño. Alcohol, evita di bebe alcohol 2 ora prome cu bay drumi. Bo ta pega soño liher pero despues bo ta lanta den anochi.
Bebidanan energetico ta duna bo un boost di energia y ta stroba bo pega soño.
Cuminda mucho pisa prome cu bay drumi, por trese molester y stroba bo di relaha pa drumi.
E luz blauw cu e screen di e aparatonan electronico ta emiti, (produci/saca) por stroba e produccion di melatonina, e hormona responsabel pa laga bo haya soño y drumi. P’esey ta importante pa no uza aparato electronico manera p.e. computer, tablet, cellular un pa dos ora prome cu bay drumi. Na lugar di esaki trata na haci actividad manera lesa un buki of haci actividad pa relaha.
