Algun siman atras Departamento di Agricultura, Cria y Pesca, conoci popularmente
como Santa Rosa, a haci un yamado na comunidad y particularmente piscadonan di
Aruba pa yuda cu e buskeda di un canasta experimental pa lionfish cu a perde den nos
lama durante pruebanan di investigacion. Santa Rosa a keda acerca pa sr. Patrick van
Brakel, conoci pa su tantisimo videonan educactivo di @Lionfishhunter Aruba, como
e @Lionfish Snack Aruba, pa por duna un asistencia na su persona y un estudio cu el
a inicia riba propio iniciativa y trahando cu @Caribbean Lionfish Alliance, @Aruba
Reef Care FoundationSr. van Brakel a bin ta experimenta cu varios "Lionfish traps" of
canasta pa Lionfish siguiendo diseño di @NOAA Office of National Marine
Sanctuaries. Su ultimo intento a ser poni algun tempo atras den lama y pa mala suerte
net despues e tormenta Beryl a azota nos costa cu consecuencia cu e instrumento cu ta
contene un luz y un camera no por a wordo localisa.
Santa Rosa semper ta yuda:
Santa Rosa mesora a compromete pa yuda sr. van Brakel pa recupera e
artefactonan y tambe sigui yuda cu e investigacion riba lionfish. E canasta ta un
diseño cu a bin ta desaroya conhuntamente cu investigadornan na Bermuda y ta basa
riba e diseño di lobster traps di e area ey. E canasta ta un bari adapta pa laga Lionfish
drenta pero dificil pa nan sali. E tabata tin un boei y un anker na dje. Manera
menciona caba, e tabata tin tambe un luz y un camera instala.
Seccion di pesca di Santa Rosa, desde 2009 cu e prome Lionish invasivo a keda
registra den nos awanan, a lidera e monitoreo di e potencial peliger invasivo aki y
investiga si por converti esaki den un pesca sostenibel cu por aporta na nos economia
y seguridad di provee alimento propio fresco y saludabel. Asina por menciona cu a
tuma lugar varios torneo di Lionfish, actividad culinario, investigacion cientifico y
mucho mas pa tanto lanta e conocemento den nos comunidad como tambe colecta
informacion practico cu por ser aplica na Aruba. Pesey ora e seccion di pesca di Santa
Rosa a keda acerca pa yuda cu e buskeda, a drenta accion mesora y rapidamente tuma
e iniciativa pa acerca piscadonan den e buskeda ya cu Santa Rosa ta reconoce semper
e conocemento profundo di lama cu nos piscadonan tin. Piscamento pa Santa Rosa ta
parti integral di e cultura, economia y naturalesa di Aruba. E aporte di nos piscadonan
pa loke ta provee cuminda fresco di calidad ta djis parti di di tur nan ta contribui na
nos isla. Nan aporte na e e herencia intangibel ainda tin ainda mucho mas pa contribui
na nos comundad.
Juan Giel a recupera e canasta:
Tabata ni un dia despues cu a emiti e yamada di auxilio, cu e conocido piscado
Juan "Tintin" Giel, cu ta forma parti di e clan di piscado di Wolff, bon conoci na
Noord pa provee pisca fresco y particularmente masbango y otro pisca di reda, a avisa
Santa Rosa y sr. van Brakel cu el a mira e artefacto. Es mas el a duna algun
indicaccion pa purba localisele. Santa Rosa y sr. Van Brakel a bay mesora y sondea e
area pero no a logra. Ta te ora sr. Giel tabata tin un dia liber di su trabounan y cu e
tabata tin tempo pa dedica na lama na su gusto, cu el a yega tera cu e bon noticia cu el
a trece e canasta pa sr. van Brakel. Santa Rosa ta manda palabra di agradecimento na
sr. Giel y tambe danki na e clan di Pedro "Buchi" Wolff pa nan contribucion cu e
logro aki. Felicitacion ta na su lugar pa nos piscadonan y sigur tambe na sr. van
Brakel cu a keda mantene speransa y e causa di combati lionfish den pantaya. Danki y
pabien.
Investigacion valioso:
Santa Rosa lo sigui conhuntamente cu demas instancia y organisacionnan
relevante y interesa pa colecta y distribui informacion. Te ainda e manera mas eficas
pa controla Lionfish invasivo ta pa tira esaki cu un tipo di harpun. Hopi biaha ta usa e
slingshot of polespear pa e tarea aki. E limitacion pa e metodo di sambuya y tira
Lionfish ta cu ta unicamente unda hende por yega y sambuya, lo por controla Lionfish
invasivo. E idea pa considera canasta pa Lionfish ta cu usando canasta posiblemente
por yega na lama mas hundo cu hende por duik y posiblemente ta un metodo di pesca
economicamente viable. Rond mundo ta unicamente algun lugar ta purbando cu e
metodo aki y pa cual motibo lo ta sumamente balioso e resultadonan di e
investigacion aki. Santa Rosa awor, cu input di piscadonan, lo traha cu sr. van Brakel
riba e proximo diseño y experimentonan pa asina mehora e modelo.
