Meta di Fundacion Lotto pa Deporte (FLpD) ta pa genera fondo pa deporte na Aruba. Ta distribui e fondonan genera entre Stichting Sportsubsidie Aruba (SSA), cual fundacion ta parti e placa cu e federacionnan cu despues ta parti esey den e clubnan. Tambe ta partie pa Fundacion Facilidadnan Deportivo (FFD) cu tin como meta pa mantene tur compleho, tur stadion di Aruba. Pa aña Lotto ta aporta ocho miyon florin na deporte.
Roland Tuitt, director di Fundacion Lotto pa Deporte, a splica cu SSA ta haya cuater miyon florin pa aña. Pero awo, locual a bin nobo e ultimo aña, ta un cambio di maneho di gobierno. Acerca lotto ta paga banco local pa fiansa den pasado di 2.1 miyon florin pa aña. Awor a bin cambio, despues cu aña pasa gobierno a cuminsa forsa Lotto pa paga debe bieu di stadionnan pa un suma total di 1.5 miyon pa aña. Esey ta pone cu ta kita e suma ey dje 4 miyon, cu ta nifica cu SSA ta haya 2.5 miyon so awo. E cambio aki ta un exigencia di gobierno y no di Lotto. Awo e fundacion ta en espera dje gobierno nobo forma y pa por bay papia cu nan un biaha mas. Idea ta pa mira si gobierno por alarga e moratorio y asina e 1.5 miyon por bay bek pa deporte.
BANCAROTA
Roland Tuitt kier pa esunnan cu ta distribui e noticia falso cu Lotto ta bay bancarota, pa nan stop, pasobra esey ta un “fake news”. E ta puntra con un compania, esta CBN, cu ta genera minimal 6 miyon florin pa aña na ganashi, con e por bay bancarota. Tin algun trabou cu gobierno mester a duna FFD pero a duna esey na FLpD. Awo ta trahando pocopoco pa rectifica esey y asina tur stadion ta bay pa FFD. Tur gasto asocia cu e operacion dje stadionnan ta bay pa FFD y asina ey e unico cos cu Lotto pa Deporte ta haci, ta genera fondo.
Asina e operacion ta y e noticia falso cu Lotto ta bayendo bancarota, ta simplemente un “fake news”. Hende no mester scucha esey, pasobra dos grupo di hende ta papia malo di e fundacion. Un ta e politiconan y e di dos ta e ex-directornan. Tuitt no ta compronde con un politico por papia malo di un organisacion cu ta genera fondo pa gobierno. E ta algo no comprendibel, pero asina bida ta na Aruba.
