Pa medio di esaki ta anuncia un cambio den maneho den Utilities Aruba N.V. (“Utilities”). Entrante 1 di november 2021 sr. Anthony Rojer lo ser apunta como e director nobo di Utilities. En conexion cu esaki, e persona cu temporalmente tabata encarga cu e maneho di Utilities, esta sr. Richard Eman, a entrega su retiro boluntario y como tal no ta fungi como director di Utilities mas.
Utilities a hiba un proceso transparente di solicitud y seleccion pa asina yega na e candidato pa e funcion di director di Utilities. E proceso tabata un proceso publico como cu a anuncia den tres diferente corant na Aruba cu Utilities ta en busca di un director y e condicionnan mara na e funcion aki. Utilities a haya varios solicitud ariba e vacatura aki. Despues di analisa e solicitudnan, a yega na tres candidato cu ta cumpli cu e rekisitonan pa e funcion. Tambe a haci un evaluacion psycologico. Den cuadro di esaki Utilities a ricibi un rapport di aptitud. Bureau InTop, como un tercer partido, imparcial, a duna Utilities un conclusion final encuanto e persona mas apto pa e funcion. Ademas, e tres candidatonan na final a ser entrevista pa Plus Accountants cu tambe finalmente a duna su recomendacion na Utilities ariba e candidato mas apto.
Utilities Aruba como tambe su accionista, ta tuma e oportunidad aki pa gradici sr. Eman pa su trabounan grandi y esfuerso durante e ultimo añanan. Entre nan ta e refinanciamento di e debenan di Utilities Aruba, WEB y Elmar cu ta e mihor financiamento di ultimo tempo, cu interes mas abou y closing fees mas abou. Cu e financiamento a bin mas structura den e governance di e companianan y ta hasi financiamento den futuro mas liher.
Ademas bou di dirigencia di sr. Eman a logra trese e interesnan di e compania den linea cu interesnan di pueblo di Aruba, pasobra aki tabata tin un desconexion antes.
Un logro importante na cual sr. Eman y Utilities Aruba a contribui ta e National Energy Policy di Aruba. Pa prome biaha Aruba tin un vision y maneho di energia con pa cumpli cu e meta di “net zero” na 2050 di e Acuerdo di Paris, y akiden sr. Eman a hunga un papel importante. Mester bisa cu Utilities Aruba bou dirigencia di sr. Eman a presenta un “Decarbonization Plan” hunto cu Web y Elmar cu metanan aun mas ambicioso cu e National Policy pa Aruba cumpli cu e meta di e Acuerdo di Paris di 2050.
Gobierno di Aruba ta gradici sr. Eman y ta desea sr. Rojer tur clase di exito den futuro.durante e ultimo añanan y ta desea su persona tur clase di exito den futuro.