Despues cu na februari California Lighthouse a cera su portanan pa publico pa por haya e debido mantencion awor tur cos ta cla pa e faro su portanann habri bek pa publico entrante e fin di siman aki.
E trabou di mantencion a keda ehecuta pa Projexon Group y a tuma lugar principalmente na e parti paden, entre otro a repara e trapi di palo, pleister y verf e murayanan parti paden y drecha e bentananan. E cambio mas grandi ta e instalacion di un ‘trapleuning’ pa por tene na dje na momento di subi e lighthouse. P’esaki Stichting Monumentenfonds Aruba (SMFA) mester a pidi permiso na Monumentenbureau mirando cu ta agregando algo nobo na e monumento.
E trapleuning no solamente lo haci e subimento mas sigur pero tambe lo yuda cu e parti di mantencion di e faro mirando cu asina awor ta evita cu ta keda pone man na e murayanan pa por tene y subi.
Pa locual ta trata e pleister y verfmento di e faro parti paden a haci uzo di e material original cual ta calki. Pa esaki Stichting Monumentenfonds Aruba a trece un experto di e compania Limeworks for di Merca pa por duna instruccion na e contratista con pa prepara e superficie y aplica e producto na e manera corecto. SMFA a documenta esaki tambe pa por tine pa otro proyectonan.
Cu esaki awor nos tin tres persona mas, cu e conocimento pa locual ta trata aplicacion di calki riba edificionan historico. Na 2019 diesshete persona a ricibi nan certificado partcipando na e curso organisa pa Stichting Monumentenfonds Aruba.
Ora ta trata di edificionan historico ta importante pa restaura esakinan cu e material original pa asina evita deterioro na e edificio. Cu e California Lighthouse ta bira e di tres monumento cu SMFA ta haci uzo di calki manera tabata uza antes. E forno di Kalki tambe a keda restaura cu uzo di calki. E uzo di calki lo por garantisa cu e monumentonan aki lo keda mihor mantene pa mas tempo y lo por asina yuda reduci tambe locual ta gastonan di mantencion pa e Fundacion.
Stichting Monumentenfonds Aruba ta gradeci Experitours pa e comprencion durante e periodo cu e faro a keda sera pa publico. Pa mas informacion tocante e orarionan cu e faro lo ta habri por sigui e pagina di Facebook di California Lighthouse Aruba.
