Ryçond Santos do Nascimento (fraccion di AVP)
Nos por a mira Evelyn (minister-president), Xiomara (minister di finansas) y Edgard (presidente di Parlamento) rabia den Openbare Bijeenkomst di awe 14 di juli 2022. E motibo ta obvio: CAft a conseha Conseho di minister di Reino pa duna Gabinete Wever-Croes II un aanwijzing/KB. E motibo ta cu gobierno no ta respeta ley (LAft) ni tampoco gobierno ta respeta e protocol cu gobierno di Reino cu Evelyn mes a firma na 2018 y a extende dia 20 di januari 2022. Gabinete Wever-Croes a viola e obligacion legal pa tin su finansas publico na ordo y pa realisa finansas publico sostenibel y balansa. CAft ta bay asina leu di bisa cu gobierno kier soluciona tur problema door di aumenta impuesto sin traha na baha gasto di gobierno. Gastonan di personal, contractnan pa servicionan cu hende pafo di gobierno y huur di edificionan a sigui, sigui y sigui aumenta.
Awo e gobernantenan y nan sostenedornan den Parlamento kier punta dede riba tur hende menos nan mes. E falta di madurez aki ta pa tapa e hecho cu CAft a desenmascara Evelyn Wever-Croes y su gabinete. E carta di CAft ta mustra cu Evelyn a bin ta gaña Pueblo desde cu e tabata den oposicion. Den programa di gobernacion 2017 Evelyn a priminti di reduci structuralmente gastonan di gobierno y en particular e lo a traha riba reduccion di gastonan di operacion di gobierno. A priminti pa mehora poder di compra di nos ciudadanonan, reduccion di e “cost of doing business” y prosperidad pa un y tur pa medio di crecemento economico. Manera nos tur por mira tur esakinan ta mentira.
Evelyn y Xiomara tabatin añanan ta campaña cu nan tin solucion pa finansas publico y cu nan lo mehora eficiencia di e aparato gubernamental. Un ehempel ta un comunicado di prensa di Xiomara di dia 4 di mei 2014 unda e ta bisa: ‘E formula pa yega na un presupuesto manehabel y despues na un presupuesto balansa ta simpel. No gasta mas cu bo tin of cu bo por paga bek (…).’ Papia pa Xiomara ta facil. Pero papia e berdad, cumpliendo cu promesanan fundamental a resulta di ta imposibel…
E realidad ta cu nan no por cumpli cu nan promesanan pa falta di conocemento, competencia y integridad. Unda cu bo bira tin fraude ta tuma luga den e aparato gubernamental. E motibo ta e mal ehempel di e mesun ministernan. Djis wak e conflicto di interes miyonario di Endy Croes y locual ta parse nepotismo den dia cla di Evelyn y Glenbert. Ora bo conta cuanto e mal maneho di Loonsubsidie, FASE, fraude na DVG, DIMP, CENSO etc. ta costa Pueblo, wak den bo cartera. Ta for di bo cartera e gastonan aki lo ser paga!