ORANJESTAD,Aruba
Na momento cu un persona disidi pa busca un mascota, e mascota ta bira su responsabilidad. E persona mester percura pa e mascota tin un bida digno di un mascota, cu ta ensera cu e mascota mester tin awa, cuminda, shelter pa solo/awasero, espacio pa cana y cuido medico veterinario nesesario.
Na momento cu pa un of otro motibo un persona no por cuida mas di su mascota, ta keda responsabilidad di e doño pa busca e miho forma pa soluciona su situacion teniendo na cuenta e bienestar y bida di e mascota. Na Aruba tin diferente forma pa busca un solucion. Tin organisacion y fundacionnan cu ta yuda animalnan haya un bida nobo, pero tambe como doño bo tin pa busca activamente un solucion sea via medionan social of otro plataformanan.
Veterinaire Dienst a haci un apelacion na comunidad pa busca e miho solucion pa e mascota of animal prome cu pensa pa yega na nos localidad na Wayaca pa eutanasia.
Entrante dialuna 8 di juni Veterinaire Dienst lo cuminsa maneha atrobe e localidad situa na Wayaca. E localidad lo ta habri pa permiti doñonan trece nan animal no desea como ultimo recurso solamente riba dialuna, diaranson y diabierna for di 7:30 di mainta te cu 1:00 di merdia. Tur otro dia y orario e localidad lo ta sera, lo no tin personal presente y no ta permiti pa laga ningun animal atras na e localidad sin supervicion. Tene na cuenta cu e mascota of animal ta keda responsabilidad di ningun otro cu di e doño.
