Bushinan di Marina a kuminsá ku un operashon impreshonante pa rekuperá un ponton enorme, ku tabata difikultá ku barkunan mas profundo por a pasa den e haf den serkania di refineria di petrolio.
E ponton, 30 meter di largura, 10 meter di hanchura i 2,5 meter di haltura, ta riba un profundidat di 8 meter i no por wòrdu hisá den su totalidat, pa motibu di su peso inmenso, i ta keda di sleip na pida pida bou di awa.
E bushinan di Marina, ku a bini Kòrsou pa trein diferente habilidat di buseo, a disidí di kombiná un ehersisio ku hasi algu bek pa e komunidat. Aña pasá nan a kuminsá ku e operashon, pero hopi lihé tabata bon kla ku tabatin nesesidat di ekipo mas pisá, pa motibu di sirkunstanshanan imprevisto bou di awa, pa terminá e tarea. E aña aki nan a bolbe bek, mihó prepará ku e material korekto i e ekspertisio ku tabata nesesario.
Djaluna i Djamars nan a hasi un gran avanse, dor di trese, ku yudansa di kran, e promé dos pidanan di ponton na superfisie. Esaki ta un logro importante den e proseso; siguientemente e sobra tres pidanan ta keda rekuperá for di awa un pa un.
Ademas di e esfuersonan na Bullenbaai, e bushinan di Marina a hasi uso di Caracasbaai komo sitio pa trein pa sambuya den profundidat. Ademas e bushinan ta sostené e bon kousa #Willifood, ku kua nan ta demostrá nan envolvimentu den e komunidat di Kòrsou.
