Boto lokal sospecha di trafikashon di hende interseptá riba laman

Djaluna último Sentro Operashonal Marítimo di Wardakosta (MOC) a detektá un boto
sospechoso na sùit di Kòrsou. MOC a detekta na promé instante dos boto ku a topa otro na parti sùit di Kòrsou, despues un di e botonan a nabegá direkshon di e isla. MOC mesora a manda un Metal Shark direkshon di e boto sospechoso ku tabata nabegá pa e isla pa kontrola esaki. Ora e boto di patruya di Wardakosta a yega na e boto sospechoso, e agentenan di Wardakosta a mira un kantidat di hende na bordo di un boto lokal.

Bou di guía di e boto di patruya, e boto lokal i e hendenan na bordo a ser dirigí pa e pir di Wardakosta. Na yegada na e pir, e agentenan di Wardakosta a hasi un kontrol riba e boto lokal. Riba e boto tabatin dos hende hòmber lokal i un mucha muhé venezolano menor di edat. E 3 personanan a ser entregá na Kuerpo Polisial di Kòrsou pa hasi mas investigashon den e kaso akí.