Partido UPP ta un partido cu ta analisa desaroyonan cu ta tuma lugar den mundo y aki na Aruba. Esaki na prome lugar a base di un amor patrio y ta expresa un opinion unicamente despues di a haci un evalucaion profundo di nos realidad financiero y economico existente. E debacle cu nos ta aden awe, sigur ta pa motibo di falta di curashi y vision. Tur esaki ta hiba nos pais na un situacion di deterioro y cu hustamente lo percura pa mas y mas gobierno Hulandes mete cu nos. Y hopi biaha ta nos mesun actitud of falta di curashi ta percura p’esaki. Den e articulo di awe nos lo trata di splica nos punto di bista aki, hasiendo uso di dos ehempel specifico cu a bin den noticia.
Na prome lugar e rapport di Rekenkamer, riba e forma cu “FASE” a wordo implementa na Aruba. Pa awor ta conoci cu e resultado ta devastador, pero kico a sosode cu e resultado? Te ainda NADA. A implementa un instrumento sin e base legal, loke por tin consideracion cu ne na momento cu e crisis a presenta. Pero despues di 2 aña, esaki si ta un falta di respet completo pa nos sistema legal y sistema di checks and balances. Y aki nos Parlamento tambe ta faya barbaramente.
Nos di UPP ta convenci cu si un rapport asina wordo presenta na Hulanda, di inmediato Tweede Kamer lo manda yama e minister encarga pa bin responsabilisa su maneho of mas bien falta di maneho. Nunca por permiti cu fayonan, manera cu e rapport di rekenkamer ta indica, wordo menosprecia manera ta obvio cu ta sosode awor. Nos tur sa di antemano caba sinembargo, kico e resultado lo bay ta si Parlamento manda yama e minister, pasobra e stempelparlement nunca lo tribi pa antende cu e rapport debidamente. Un Parlamento sin cohon ta e motibo pakico nos Estado di Derecho a wordo atacha te cu Hulanda mester a interveni. Den e rapport di National Integrity System cu a wordo presenta algun siman atras y cu dos minister a ricibi man habri, ta bisa bon cla con deficiente nos Parlamento ta. E ta un di e pilar zwak, cu no por sostene un sistema di integridad nacional.
Esey ta hiba nos na e siguiente ehempel, esta funcionamento di nos mandatarionan y nan falta di vision. Nos por a tuma nota cu minister Wever a firma un MoU cu un compania pa atende cu economia circular. Riba papel tur cos lo bay mustra tremendo y e minister lo por bay gaba cu e si ta bin cu un empuhe pa nos economia cu ta den intensive care. Pero con a para cu e maneho definitivo y concreto pa atende cu desperdicio na Aruba. Nos por a waak cu e secretario di Estado hulandes sra. van Huffelen a haci un yamada pa bin cu un solucion pa dump entre otro, pero mientras tanto e situacion na dump a deteriora pio ainda.
Pakico enfasis riba e MoU cu e minister a firma? Na prome lugar e gobierno lo mester tin un plan concreto caba con lo bay recohe y maneha desperdicio en general y con lo bay soluciona e problema di dump en particular. Nada di esaki no a sosode y e gobierno no por bay beroep su mes cu e no ta mucho tempo na mando. Ta for di hopi tempo caba, UPP ta señala e desaster cu ta tumando lugar den Serlimar y na dump, pues tabata tin suficiente tempo pa actua. Pero ta obvio cu a prefera di keda keto. Pa colmo riba lista di un di partidonan cu ta den coalicion, a aparece un ex-director di Serlimar, cu sigur tabata na altura di henter e situacion di Serlimar. Pero despues di eleccion a tuma retiro, en espera kizas pa un mihor puesto den nos aparato publico of semi-publico?
UPP den gobierno lo no a tolera un mandatario cu a comete fayonan garaval manera Rekenkamer a divulga y tampoco lo acepta e mesun maneho di semper, esta firma MoU cu despues lo resulta den lachi atrobe vooral awor cu no tin placa. Nos lo keda na merced di Hulanda pasobra nos no tin “balls” pa atende prome aki cu nos mesun forma di proceder y tampoco cu e falta di control debido di Parlamento. Den pasado tabata tin mandatarionan cu si tabata tin e interes di Aruba na pecho y a expresa nan opinion abiertamente manera a caso di e famoso “postema cu lo rementa”. Awendia ta prefera di cultiva e postema pa evita cu e ta rementa.
