Cuido medico na Corsou ta den pleno bista publico y esaki no pasobra e cuido ta laga di desea, pero pa motibo di problema financiero. E hospital a costa pueblo Curazoleño un schat di placa. E debe di e centro medico nobo ta sigui aumenta y awor e specialistanan ta contempla e posibilidad di bandona e isla. Pues tin obviamente transparencia.
Prome cu nos aki na Aruba disidi di argumenta cu e cuido na nos Isla no ta core ningun peliger, por fabor pensa dos biaha. Na Aruba ta keda exisiti e ley di OMERTA. Esaki ta un palabracion entre mafiosonan pa di ningun manera duna realse na e realidad existente. Keda SEMPER keto of atene bo mes na e consecuencianan.
For di comienso di “vernieuwbouw” di dr. Horacio Oduber Hospital na 2011, mi persona, como miembro di Parlamento a haci preguntanan encuanto e costo di e proyecto pero tambe e calidad di e trabou cu e contratista extranhero a bin ta desplega. Mi a wordo tilda di ta contra desaroyo di cuido medico na Aruba y cu e hospital lo bay ta un hoya cu otro islanan lo bay ta jaloers riba dje. Tambe mi wordo tilda di ta vengativo pasobra e proyecto cu ami a realisa na San Nicolas esta ImSan, no a haya e acogida cu ami lo a spera. Y te hasta cu ta “Zelos” lo mi tabata tin pasó ami no a logra traha algo semehante asina. Mescos mi a wordo tilda, cu mi no por biba cu a dicidi di amplia y renoba e hospital na e mesun sitio y cu nan no a sigui cu e proyecto di un hospital na San Barbola, manera cu mi ministerio a presenta e tempo ey.
Tin biaha mi ta keda keto, y desde e ultimo biaha mi a keda keto pa basta siman. Pero mirando cu nos Parlamento ta keto riba e topico, incluso esnan di oposicion, mi ta sinti cu mi no por keda sin bolbe pone atencion na e topico aki.
Awor aki nos ta para dilanti un proyecto cu despues di mas di 10 aña ainda no ta cla y cu esnan cu ta bishita e hospital lo por ripara cu ya caba tin algun problema cu e construccion mediocre y problema di mantencion.
Pero loke ta yama mas mi atencion ta e hecho cu TUR hende ta keto keto despues cu a kibra e contract cu e architecto mericano. Ni di e parti politico y pio ainda te hasta e sindicatonan ta “muisstil”!! Tambe no ta scucha ni lesa nada ki dia e hospital ta keda cla, cua contratista lo termina e trabou y cuanto extra e gastonan lo bay ta???
Nos sa exactamente kico ta pasando cu e hospital nobo na Korsou y cuanto esaki a costa, pero aki na Aruba tur cos ta manera benta den “doofpot” y “nobody cares”!! Sky is the limita y tur hende ta sigui guli manda abou, incluso e ministernan cu ora ta den pasado a priminti den Parlamento como parlamentario, cu unavez nan ta den gobierno, lo haci investigacion. Nos por corda bon bon cuanto bochincha miembronan di e gobierno actual a haci tempo ey ora cu nan tabata den oposicion. Lo a laga haci un investigacion profundo, un investigacion cu mi ta convenci cu lo a tuma lugar, pero cu a desaparese den e lachi. Pakico?
Pues OMERTA riba tur nivel y e pregunta ta keda na vigor:
Cuanto placa e proyecto a costa y ki dia elo keda cla porfin?
Comunicado Booshi Wever
1 comment
[…] Source link […]