Den “NoticiaCla” a sali un articulo cu tin parlamentario lo ta contemplando pa bay traha como “kaakchirurg” pero cu mester papia cu AZV ainda. E pregunta ta kico tin di papia? Lo bai cambia REGLANAN vigente pa previlegia y acomoda un miembro di e F&F, mirando cu AZV TIN reglanan vigente pa esnan cu tin cualkier specialisacion! Segun e Parlamentario e lo ta contemplando su retiro, ya cu como presidente di comision di Salud di Parlamento e ta wak e falta di specialista enorme cu Aruba tin, awor cu e chance a presenta pe, ya cu Aruba lo ta buscando un kaakchirurg pa añanan. Segun e articulo e ta bisa cu e ta mira cu tur e placanan ta bay afo.
Un paar di aña pasa caba nos a critica un contratamento di un “kaakchirurg” cu HOH a tuma den servicio. Nos a critica esaki dor cu ta conoci cu por ehempel un ordodontista (specialista) firma un contracto cu AZV, e no por traha como dentista, aunke cu ela studia pa esaki tambe. Den e caso di un “kaakchirurg”, NO TA DIFERENTE.
Ta conoci cu na Aruba no tin suficiente casonan pa un “kaakchirurg”. Na prome lugar un “kaakchirurg” lo no por genera suficiente entrada pa e por biba di dje. Na di dos lugar exigencia hulandes pa specialista ta rekeri cu un specialista mester cumpli cu rekisitonan. Un di nan ta e cantidad di casonan cu mester atende. Aki ta na unda cu un “kaakchirurg” na Aruba probablemente lo no por cumpli cu e rekisito aki.
Exigencia pa cumpli cabalmente cu un cuido medico di calidad ta halto, pero cuido medico ta caro. Esey ta pone responsabilidad halto pa esnan cu ta maneha cuido medico. Ora AZV haya un peticion pa cubri cierto gasto medico specialisa, e lo mester tene cuenta cu e gasto, pero tambe si e specialista ta cumpli cu tur condicionnan pa haci un trabou di calidad sin tene cuenta cu afiliacion politico.
No por permiti en absoluto pa politica haci entrada den ehecucion di e maneho di cuido medico. Ta p’esey por ta cu e “kaakchirurg” a drenta como parlamentario pa e cambia e regla aki di modo cu e previlegiado SI por traha como dentista tambe? Ta di spera cu e director actual di AZV y e Raad van Commissarissen no debloga pa e presion cu sigur lo bini di parti di gobierno!
Pesey tambe como presidente di comision di Salud, e Parlamentario no por djis bin cu tin hopi placa ta bay afo y cu Aruba falta di specialista. Loke mester busca pa informa su mes, y pio ainda nos pueblo, cuanto placa ta wordo gasta den trabounan di “kaakchirurgie” na Aruba. Cuanto caso tin pa aña y cu ta presenta. Nos informacion ta cu p.e. e sra. chirurg cu hospital a pone algun aña pasa, durante 3 aña di su permanencia na Aruba, no a haci ningun “operacion di cachete”, pero si a strika un suma grandi como empleado di HOH. A caso esaki ta e direccion cu kier bay, pa contra regla hinca cu lo bin cu un “kaakchirurg” den servicio di AZV cu un suma vasto pa aña, mientras cu manda un hende afo lo por ta mas economico? A caso ta intencion pa e persona aki sigui haci su trabounan di dentista tambe na banda, loke cu awor no ta e caso?
