Den un di mi ultimo articulonan mi a admiti di awendia tin e tendencia di keda keto y laga cos pasa. Pero como un bon yiu di tera mi a ripara cu hopi cos cu ta pasa ta keda hiringami. Un di nan ta e situacion na Parkietenbos y otro ta e actitud cu nos gobierno y Parlamento pa loke ta crisis di relacion cu Hulanda. Particularmente e impasse y supuesto “aanwijzing” cu lo a duna motibo suficiente pa prome minister cancela un viahe pa Nacionnan Uni y pa Parlamento kibra su reces (vakantie). Mi pensamentonan a bay na cantidad di biahanan cu nos di UPP a bin ta propaganda un unidad nacional pa atende nos problema cu Hulanda.
Defunto Lionel Capriles a bisa añanan atras cu Aruba ta “politiek verziekt”. E abismo cu nos ta aden ta danki na nos mes politiconan y e malesa di politikeria y polarisacion cu nos no kier cura aki na Aruba. No kier traha espacio pa un union berdadero y asina brinda e pueblo aki un speransa di un mihor mañan.
Den mas di 50 consehonan desde 2014 CAFT tabata urgi e gobiernonan di Aruba pa cumpli cu palabracionnan haci y percura pa un “gezonde overheidsfinancien” y introduccion di e reglanan estricto di Bon Gobernacion. Realidad di bida ta cu a scohe pa sigui goberna con cu ta. Prueba di esaki ta p.e. e cantidad di manipulacion den tanto e gobierno di AVP, despues den esun di POREDmep y lamentablemente awe den esun di MEPraiz.
E problema principal ta cu esnan responsabel, no a y ni ta carga nan responsabilidad. No tin, ni tabata tin “DAADKRACHT”. El a cuminsa cu e entreganan e.o. cu Witte Donderdagakkoord di 28 di maart 2013, e presupuesto di 2014, e combenio di 22 november 2018 y despues e acuerdo di “blackfriday” esta 13 di november 2020. Awe nos por scucha p.e. di partido AVP cu e situacion aki na Aruba ta exigi un union nacional pa asina enfrenta Hulanda cu determinacion. Ora na 2014 y 2015 UPP a propone pa bin cu un gabinete nacional pa asina nos por atende cu Hulanda, ningun hende no a worry.
Durante campaña partido RAIZ pa medio di su lider durante di un debate na TeleAruba a laga sa cu loke Aruba mester ta un gobierno di un “Gran Coalicion Arubiano”. Ora nos a kere cu despues di eleccion di 2021 tabata tin un chens pa un gabinete nacional of “zakenkabinet”, nos ta mira cu e gran coalicion Arubiano tabata di MEPraiz, un gobierno di un base masha smal mes. Y ultimo durante tratamento di presupuesto e aña aki, riba pregunta di Parlamentario di A21 tocante e posibilidad di un gabinete nacional, prome ministro a laga sa cu e no tin problema cu esey, pero no cu partido AVP si. Y e ta kere cu pueblo ta scohe politiconan y ta politiconan mester atende cu e problemanan cu tin nos dilanti.
Loke hopi no kier scucha ta, cu e solucion di nos Aruba no ta den un gabinete politico, sino uno nacional, uno di crisis of si bo kier yame asina, un zakenkabinet.
Desde 2014 UPP a bin ta adverti pa e intencionnan aki di Hulanda. Nos a mustra riba e polarisacion y division cu tin na Aruba y nos a boga pa nos uni pa enfrenta Hulanda. Di 2014 nos a sugeri pa bin cu un Dialogo Nacional, basa riba un comision a la RCOA cu Betico Croes d.f.m. a bin cu ne na 1979. Intencion ta pa yega na un Compromiso Nacional pa delibera cu Hulanda y restablece confiansa den nos gobernacion. Den cuadro di esaki e tempo ey, nos a sugeri caba un “zakenkabinet”. Despues di eleccion 2017, UPP a bolbe propone oficialmente den un carta na gobernador, pa prome cu bin cu un gabinete politico, bin cu un “zakenkabinet”. Asina introduci e reglanan estricto di Bon Gobernacion y laga un instancia internacional haci un investigacion profundo di e situacion real di nos finansas publico. Atrobe nos NO a haya oido. Den varios carta dirigi na e gobierno di POREDmep, nos a keda sugeri esaki, particularmente ora cu nos a constata cu tabata tin un “tijdbom” poni bou di e gobierno, ora cu a core cambia e ley di Laft y no cumpli cu loke a keda palabra dia 22 di november 2018. Tur esaki PROME cu e crisis di Corona. Despues cu e crisis a presenta, riba 20 di april 2020, na un di e famoso dialogo politico nos a bolbe sugeri esaki y pa ultimo atrobe na momento cu e resultado di ultimo eleccion tabata conoci.
Awe atrobe den Parlamento nos por scucha di ambos banda, tiramento di lodo contra otro (e mesun “politieke” verziektheid) y despues di lastra otro y tilda otro, ta pidi pa union pa asina nos sali pa nos pais. Pero loke realmente ta resalta, ta cu no tin e boluntad ey.
Loke a bin ta tumando lugar, mi ta kere cu tanto esnan cu ta sostene e coalicion y tambe e ministernan mester tuma nan retiro. Y asina esnan cu mas voto drenta Parlamento y asina Parlamento den su totalidad institui un gabeinete nacional of di crisis (un “zakenkabinet”) cu tareanan fiho y defini, pa asina e confianza den pueblo y cerca Hulanda wordo restaura di berdad.
Pero cu e actitud di nos politiconan esaki parce un “whishful thinking” di mi banda.