Na Caribbean Palm Village durante oranan di mainta tabatin un protesta di trahadonan , mirando cu negociacionnan cu sindicato FTA a pega. Segun Rayan Giel director di negociacion di FTA e negociacion a pega na momento cu ta buscando derecho di e trahadonan. Loke cu ta pega cu ne ta e parti di Bonus no ta wordo trata husto. A pone e punto aki na mesa di negociacion pero gerencia no a acepta e parti aki. Lamentablemente e bonus di e trahadonan a keda paga sin cu e la keda evalua, aki ta mira e discrepancia cu tin y dicon ta desea di trata e punto aki riba mesa.
Tambe e di dos punto riba mesa ta trata e negociacion di aumento di salario. FTA a haci su investigacion unda cu a mira e situacion di costo di bida pa asina wak si e salario cu e trahadonan tin actualmente ta esun di mas husto pa nan costo di bida cu ta subiendo dia pa dia na Aruba.
Loke cu a pone un stop na e negociacionnan y a tuma e decision pa sali pafo y protesta ta debi cu e CAO a caduca juli aña pasa y a pidi pa duna e aumento retroactivo , pero Caribbean Palm Village a nenga esaki tambe. Trahadonan ta sinti cu gerencia ta faltando nan respet y pa e motibo aki mes a duna e decision di Sali pafo y exigi respet.
E protesta a tuma luga den oranan di mainta y asina a demostra cu FTA t’ey y despues e trahadonan a bay traha bek y lo keda pendiente pa haya un contesta di gerencia mas pronto cu ta posibel. Dado caso no haya un contesta e protesta por escala. Na momento cu gerencia a keda notifica cu lo tin protesta gerencia a avisa sindicato FTA cu si protesta tur cos ta keda bari for di mesa, esaki sigur no ta un bon contesta. Den negociacionnan y derechonan di trahado gerencia mester por tin e madurez di sinta na mesa y ta husto cu su trahadonan pa asina yega na un punto positivo pa ambos parti. Den caso di Caribbean Palm Village esaki no ta e caso.
