Tourism Corporation Bonaire (TCB) huntu ku shete otro partner mas di nos isla a uni forsa pa e Toronto Outdoor Adventure Show ku a tuma lugá di 23 pa 25 di febrüari 2024.
Durante e evento ku a dura tres dia tabatin hopi atenshon pa e stènt boneriano ku a atraé representantenan di medionan di komunikashon, konseheronan di biahe i profeshonalnan for di e sektor turístiko. BONHATA, Captain Don’s Habitat, Delfins Beach Resort, Dive Friends, Divi Flamingo Beach Resort, Grand Windsock, Plaza Beach & Dive Resort i Tourism Corporation Bonaire a representá nos isla.
Banda di e presensia stratégiko na e Toronto Outdoor Adventure Show, direktor Miles Mercera a pone énfasis riba e aserkamentu proaktivo di TCB pa loke ta trata diversifikashon di merkado: “Partisipashon na eventonan manera e Toronto Oudoor Adventure Show ta un parti importante di nos strategia di diversifikashon. Pa medio di enfoká riba merkadonan nobo na Canada nos ke stimulá atenshon pa Boneiru i hasi uso di e lansamentu resien di buelonan direkto di parti di WestJet. E aserkamentu proaktivo akí ta konektá ku nos meta pa kontinuamente amplia nos alkanse i mustra e bunitesa inigualabel i e posibilidatnan di aventura ku Boneiru ta ofresé.”
E show akí tabata un oportunidat ekselente pa Boneiru pa mustra su presensia den área di Toronto, prinsipalmente despues di e lansamentu resien di buelonan direkto di parti di WestJet. E ta brinda un plataforma balioso pa fiha atenshon riba Boneiru su bunitesa natural i pa kompartí informashon esensial ku e presentenan, di kua hopi no tabata sa na unda Boneiru ta keda i no tabata na altura di loke nos isla tin pa ofresé.