Tourism Corporation Bonaire (TCB) i seis partner na nos isla a partisipá dia 27 i 28 di yanüari na e Travel & Adventure Show na New York.
E stènt di Boneiru tabata bon bishitá durante e evento ku a dura dos dia. E show a hala mas ku 20.000 bishitante, entre otro prensa, konseheronan di biahe i profeshonalnan for di e sektor di biahe. BONHATA, Captain Don’s Habitat, Delfins Beach Resort, Dive Friends, Divi Flamingo Beach Resort, Plaza Beach & Dive Resort i Tourism Corporation Bonaire a representá nos isla.
E show akí a resultá un ekselente plataforma pa Boneiru pa establesé un presensia fuerte den área di New York. Esaki a duna oportunidat pa ‘highlight’ e bunitesa natural di nos isla i pa kompartí informashon tokante e buelonan direkto kumbiniente ku United Airlines saliendo for di Newark. E énfasis tabata riba presentashon di Boneiru komo mas ku solamente un destinashon pa buseo i mustra e vários eksperensianan ku nos isla tin di ofresé na nos bishitantenan.
Den kolaborashon ku partnernan na nos isla, Tourism Corporation Bonaire ta preparando su mes pa e Toronto Outdoor Adventure Show, ku ta planiá pa 23 te 25 di febrüari 2024. Partisipashon na e show akí ta sirbi komo sosten na e buelonan di WestJet for di Toronto pa Boneiru ku resientemente nan a lansa.
