Dia 8 di febrüari Boneiru a yama bon biní na ehekutivonan di Carnival Corporation i Carnival Cruise Line. Presente tabata Marie McKenzie, Senior Vice President di Government & Destination Affairs pa Carnival Corporation, Richard Pruitt, Vice President di Environmental Operations pa Carnival Cruise Line i Carlos Estrada, direktor di Commercial Home Port Operations pa Carnival Cruise Line.
Meta di nan bishita tabata pa siña konosé nos isla mas mihó, deliberá tokante futuro kolaborashon i haña un mihó bista di e vishon di nos isla ku ta enfoká riba e ophetivonan di inklushon di komunidat, turismo di kalidat ku tiki impakto i un strategia di marka koherente ku enfoke riba loke e bishitante ta eksperensiá. TCB ta kere fuertemente den enfoká riba e eksperensia boneriano di outentisidat, hospitalidat, naturalesa i trankilidat. Di su banda gobièrnu di Boneiru a desplegá vários inisiativa pa engrandesé e bentahanan di turismo pa nos isla i su habitantenan.
Stakeholdernan, entre otro partnernan di medionan di komunikashon, partnernan direkto den industria krusero i funshonarionan di gobièrnu a haña oportunidat pa subi na bordo di e barku krusero Carnival Horizon i eksperensiá un rekorido i tambe partisipá na un seshon di pregunta i kontesta.
TCB, huntu ku gobièrnu di Boneiru, a stipulá un ruta pa e ehekutivonan di Carnival pa sera konosí ku nos isla i mira kiko Boneiru tin pa ofresé su bishitantenan i eksplorá e áreanan di interes i bentaha mutuo. Diputado Hennyson Thielman, e Unidat di Asuntunan Ekonómiko, kapitan di haf, e tim di Tourism Corporation Bonaire i ehekutivonan di Carnival Cruise Line a papia tokante nan kolaborashon i e plannan pa futuro pa nos isla.
E grupo a gosa di un bishita na haf di Boneiru i un tour riba nos isla. E tour a enserá parada na diferente sitio, entre otro e bich di ‘kitesurf’, Sorobon, Thousand Steps, Marshe Rincon i Seru Largu, kaminda e partisipantenan a haña sa mas tokante kultura, historia i inisiativanan konsiente di medio ambiente di nos isla. Na kada parada tabatin oportunidat pa bai den kòmbersashon ku plataformanan di naturalesa, partnernan di e sektor i embahadornan.
‘Nos ke pone énfasis riba preservashon di naturalesa i nos patrimonio kultural komo partinan integral di nos industria di turismo i e desaroyo ekonómiko sostenibel di Boneiru’, segun diputado Thielman.
‘Nos ta orguyoso ku tur nos markanan ta para na Boneiru, di manera ku nos wéspetnan por eksperensiá e paisahe natural i rikesa di e kultura. Nos ta spera ku e bishita akí lo sigui fortifiká nos partnership, miéntras nos ta traha huntu pa trese bishitante pa e isla akí i na mes momentu nos tin un impakto ekonómiko positivo pa e komunidat lokal’, segun Marie McKenzie, senior vice president di Government & Destination Affairs pa Carnival Corporation.
‘Serka Carnival Cruis Line, i serka nos markanan ruman, nos ta duna prioridat haltu na maneho di e impakto ku nos flota tin riba medio ambiente i mantenshon di rekursonan natural importante. Tabata un plaser pa informá ámtenarnan di Boneiru na altura di e esfuersonan akí i pa ku nos mes wowonan mira e milagernan natural i birgen ku nos wéspetnan a bin ta apresiá na e isla akí’, segun Richard Pruitt, vice president di environmental operations pa Carnival Cruise Line.
‘Den haf di Boneiru nos no por warda pa kuminsá un kapítulo nobo di kolaborashon. Nos meta ta pa okashoná un revolushon den e manera ku nos ta aserká i ehekutá turismo krusero di Boneiru. Ku esaki nos no ke solamente mehorá e eksperensia di bishitante, pero tambe stimulá kresementu ekonómiko duradero na nos isla’, segun kapitan di haf Gunther Flanegin.
Direktor di TCB, Miles Mercera, a bisa: ‘Nos ta entusiasmá tokante nos futuro kolaborashon. Nos mishon pa inspirá mundu pa pensa i aktua otro riba tereno di turismo ta kuminsá serka nos komo ‘trendsetter’-nan i lidernan di merkado pa kambia e paisahe i e dinamismo di kon nos ta manehá, mira, eksperensiá i ehekutá nos aktividatnan turístiko.’
