Tourism Corporation Bonaire (TCB), den
kolaborashon ku Entidat Públiko Boneiru, Bonaire International Airport (BIA) i Bonaire
Hotel and Tourism Association (BONHATA), djadumingu último 3 di novèmber 2024, a
yama bon biní na e promé buelo di Corendon Dutch Airlines pa Boneiru. Nan a risibí e
Airbus A350 ku un saludo di embahadornan lokal, siguí pa un seremonia festivo na
aeropuerto.
TCB a duna tur e bishitantenan ku a yega un kaluroso bon biní den un ambiente kultural
ku músika folklóriko di ka’i òrgel i ku embahadornan lokal bistí den trahe tradishonal
folklóriko. Komo muestra di apresio ku nan a biaha pa Boneiru riba e promé buelo di
Corendon Dutch Airlines, tur bishitante a haña un regalo di bon biní.
Riba invitashon di Corendon Dutch Airlines, 80 kreadó di kontenido, influensiadó,
medionan di komunikashon i wéspetnan spesial a eksperensiá e buelo nobo pa Boneiru
personalmente, i akí nan ta bai deskubrí e bunitesa natural, e kultura i e ofertanan úniko
di nos isla.
Durante e seremonia Miles Mercera, direktor di TCB, a ekspresá su entusiasmo tokante
e kolaborashon i e buelonan nobo di Corendon Dutch Airlines pa nos isla. “Esaki ta marka
un logro importante pa e konekshon aéreo di Boneiru ku Oropa”, segun Miles Mercera.
“Hulanda i su paisnan besiña ta keda un merkado importante pa nos isla. Bishitantenan
di Boneiru i habitantenan di nos isla ku ke biaha pa Hulanda òf pa un otro pais na Oropa,
awor tin mas opshon i mas aksesibilidat pa biaha i eksplorá.” Diputado Clark Abraham,
Maarten van der Scheer, direktor di BIA i Gunay Uslu, direktor di Corendon, tambe a
ekspresá nan entusiasmo i nan ta anhelá pa fortifiká e kolaborashon entre Corendon
Dutch Airlines i Boneiru mas aleu.
Corendon Dutch Airlines ta bula dos biaha pa siman, riba djárason i djadumingu for di
Amsterdam pa Boneiru ku un eskala na Kòrsou i for di Boneiru direktamente pa
Amsterdam.
