Boneiru ta yama bon biní na e barku krusero Carnival Celebration, markando un debut memorabel den área karibense

Ku orguyo Boneiru pa promé bes a yama bon biní na e barku krusero ikóniko Carnival Celebration. Kapitan Vincenzo Alcaras i su tripulashon dediká, huntu ku 5683 bishitante entusiasmá, den un forma elegante a aserká kosta di Boneiru i ku esaki nan a marka un suseso memorabel pa industria di turismo di nos isla. 

Carnival Celebration a yega pa 7 or di mainta i a keda te 10 or di anochi mará na waf, pasando henter dia na Boneiru, di manera ku e wéspetnan por a gosa kompletamente di tur loke nos isla tin di ofresé. Diputado Jolinda Craane a yama kapitan Alcaras bon biní i a ekspresá su gratitut pa e echo ku nan a skohe Boneiru komo parti di e ruta pa e bishita históriko akí.

E interkambio seremonial di bandera di Boneiru a simbolisá e echo ku e barku a adoptá identidat di nos isla i ku awor tin un laso fuerte entre Boneiru i Carnival Celebration. Komo muestra di bon boluntat a ofresé Boneiru su famoso salu i Ròm Rincon na kapitan i tripulashon di e barku, ku kua a personifiká patrimonio kultural di nos isla.

E interkambio di plakat a hasi e laso entre Boneiru i Carnival Celebration mas sólido ainda, di manera ku e suseso memorabel akí a keda konmemorá den un forma tangibel i permanente. Kapitan di haf Gunther Flanegin a entregá kapitan Alcaras un rekuerdo outéntiko ku a kapturá e yegada triunfal di e barku na Boneiru.

Miles Mercera, direktor di Tourism Corporation Bonaire, a ekspresá su apresio pa medio di hasi entrega di ‘Bonaire – point to point’ na kapitan di e barku, un impreshonante publikashon ku ta mustra e maravianan natural di nos isla. Dòrná ku un bunita mensahe, e buki ta sirbi komo prueba di Boneiru su dedikashon i gratitut. E ‘port agent’ Byron Tromp tambe a uni su mes na esaki pa medio di regalá e kapitan algun buki di Boneiru, loke a enfatisá e enkanto úniko di nos isla mas tantu ainda.

E bishitantenan a gosa henter dia di e atrakshonnan di Boneiru i nan a atmirá e bunita paisahenan. Nan a brasa nos kultura lokal bibitu i nan a purba nos delisioso platonan. Nan a sinti nan mes bon biní i nan tabatin tremendo eksperensianan, di manera ku nan por a apresiá e bunitesa i hospitalidat inkomparabel di Boneiru.

Carnival Celebration, un di e añadishonnan mas nobo di fleta di Carnival Corporation, ta representá un meskla remarkabel di modernismo i tradishon. Ku su impreshonante 17 dèknan i 2600 kamarote pa pasahero, e barku ta forma e esenario pa biahenan inolvidabel. E barku ku ta brasa sostenibilidat, ta e di dos barku di Carnival ku ta keda propulsá pa gas natural líkido ku ta kima mas limpi, loke ta proba ku e kompania tin un kompromiso ku responsabilidat pa medio ambiente. Nan a konstruí e barku ku partinan reusabel di diferente otro barku, loke ta personifiká dedikashon di Carnival na práktikanan inovativo i konsiente di medio ambiente. 

E ruta di nabegashon di Carnival Celebration ta enserá e destinashonnan enkantador Aruba, Boneiru, Kòrsou i Miami i ta ofresé e pasaheronan e mihó eksperensia hulandes karibense. 

Ku anhelo Boneiru ta spera e siguiente bishita di Carnival Celebration, ku ta planiá pa 21 di yüni 2023. Esaki lo sòru pa festividatnan i enkanto kontinuo pa tantu nos poblashon lokal komo pa nos bishitantenan. Aworakí ku Boneiru ta drentando ‘low season’, presensia di barkunan manera Carnival Celebration ku ta keda henter dia, ta ofresé perspektivanan positivo pa e operadornan ku ta traha inkansabelmente den e sektor akí promoviendo prosperidat.

Boneiru ta ekstendé su mas profundo gratitut na kapitan Vincenzo Alcaras, tripulashon di Carnival Celebration i Carnival Corporation pa a skohe nos isla komo destinashon pa e debut remarkabel akí.