Tourism Corporation Bonaire ta informá
Tourism Corporation Bonaire (TCB) ta kontentu di por anunsiá e skemanan di buelo pa e di dos kuartal di 2022 di su partnernan di aviashon American Airlines, Delta Air Lines i United Airlines pa e lunanan mart i aprel 2022.
Durante luna di mart i aprel American Airlines ta ofresé buelo un biaha pa dia pa Boneiru for di Miami, Florida. Delta Airlines te ku 10 di aprel 2022 tin buelo direkto kuater biaha pa siman pa nos isla for di Atlanta, Georgia riba djaluna, djárason, djabièrnè i djasabra. Durante e dos lunanan ku ta sobra den e di dos kuartal tin dos buelo pa siman riba djamars i djasabra. United Airlines ta mantené su skema di buelo aktual ku un buelo pa siman pa Boneiru for di Houston, Texas riba djasabra ku un buelo di regreso riba djadumingu i su buelo semanal riba djasabra for di Newark, New Jersey.
TCB ta partisipá ku e buelonan for di Hulanda ku e partnernan KLM i TUI ta keda sin kambio i ku ta bai amplia e skema di buelo diario aktual for di Amsterdam.
TCB ta verwagt un di dos kuartal fuerte pa 2022 i lo kontinuá ku su esfuersonan i su kolaborashon ku tur partner di aviashon. E buelonan èkstra ya kaba ta online i por hasi reservashon pa e lunanan binidero.
Resultadonan preliminar di e di dos kuartal
Durante e dos promé lunanan di aña 2022 TCB a opservá un bahada leve di e kantidat di bishitante di e merkado norteamerikano, esta den luna di yanüari i febrüari, komo konsekuensia di e variante di COVID Ómikròn, ku tabatin influensia riba e konfiansa ku konsumidónan tin pa loke ta trata biahamentu. For di meimei di luna di febrüari TCB ta mira un demanda kresiente for di e merkado norteamerikano, kaminda e demanda pa reservashon ta oumentando atrobe, loke ta resultá den e posibilidat pa añadí buelo èkstra pa Boneiru. E merkado hulandes ta keda stabil i ta duna señal di kresementu.
