Dia 22 di desèmber 2022 Flamingo International Airport a yama bon biní na e avion nobo di Divi Divi.
Tourism Corporation Bonaire (TCB) a lansa un kampaña nobo pa 2023 ku e kompania lokal di aviashon Divi Divi Air ku ta un partner apresiá pa Boneiru. For di awe ta yama pasaheronan di tránsito pa Boneiru bon biní i ta transportá nan ku un avion di Divi Divi ku e marka Boneiru.
Divi Divi Air ta un di e kompanianan lokal di aviashon ku ta bula entre e islanan ruman Aruba, Boneiru i Kòrsou. Pa medio di duna e avion un marka, TCB ta ofresé klientenan aktual i di futuro e posibilidat pa saka un ‘selfie’ ku e flamingo boneriano i ta inspirá bishitantenan for di islanan besiña pa haña sa mas tokante Boneiru, pero tambe pa duna nan e ‘sintimentu Boneiru’ ora nan ta abordá nan buelo pa bai Boneiru. Esaki lo duna nos isla mas popularidat tambe ora ku otro avionnan baha na aeropuerto di Aruba i Kòrsou, na momentu ku nan mira e avion ku e marka Boneiru.
Miles B M Mercera, direktor di Tourism Corporation Bonaire, a bisa: “Nos ta agradesido pa e kolaborashon i e dedikashon di hopi aña di Divi Divi Air na nos isla Boneiru. Esaki ta inisio di un ‘partnership’ i kolaborashon duradero ku un di nos partnernan lokal den aviashon mas importante ku ta konektá Boneiru ku nos islanan ruman.” #Itsinournature
Den kolaborashon ku BIA, TCB a yama bon biní na e avion di Divi Divi ku e marka Boneiru ku un saludo ku awa i un ‘goody bag’ pa e promé bishitantenan ku a abordá e avion.
