En total 15 partners a eksponé den ‘Bonaire Pavilion’
E aña akí Crystel Pourier, representante pa Merka i Canada, i Annette Emerenciana, Marketing PR i Kordinadó di Proyekto, for di 1 te 4 di novèmber 2022 a representá Tourism Corporation Bonaire (TCB) na e di 46 DEMA Show anual na Orlanda, Florida.
Despues di un show mas chikitu pa motibu di e pandemia, e evento ku ta dura kuater dia tabatin e grandura di ántes e aña akí atrobe. Kompanianan di benta por mayor, ‘influencers’ i amantenan di Boneiru a bishitá e Bonaire Pavilion. Nan a hasi esaki sea pa sera konosí ku nos isla, òf pa papia tokante nan bishita na Boneiru i plania esaki. E aña akí e ‘Bonaire Pavilion’ a konsistí di e siguiente partnernan: AB-Dive, Belnem House, BONHATA, Buddy Dive Resort, Captain Don’s Habitat, Chogogo Beach & Dive Resort, Courtyard by Marriott, Dive Friends Bonaire, Divi Flamingo Beach Resort, Grand Windsock, Plaza Beach & Dive Resort, Resort Bonaire, STINAPA, Tourism Corporation Bonaire i VIP Diving.
Tur hende ku a bishitá e Bonaire Pavilion a keda enkantá ku su aparensia nobo. E aña akí e pavilion tabatin pankarta nobo i grandi i mayoria partner tabatin un dekòr nobo, tur kos desiñá den Boneiru su estilo di marka nobo.
Pa di dos aña TCB a traha huntu ku ScubaRadio pa e akshonnan di duna regalo. Tur dia tabata regalá vários premio di Boneiru via diferente wega promé ku e show kuminsá. E ganadónan tabata hopi entusiasmá tokante e premionan ku nan a gana i nan ta anhelá pa bishitá nos isla. Belnem House, Captain Don’s Habitat, Chogogo Beach & Dive Resort, Dive Friends Bonaire, Divi Flamingo Beach Resort, Grand Windsock, Plaza Beach & Dive Resort i VIP Diving a entregá e premionan.
E DEMA Show 2023 ta tuma lugá for di 14 te 17 di novèmber na New Orleans, Louisiana.
