Inspirá futuro biaheronan ku nos eksperensia kulinario
Tourism Corporation Bonaire (TCB) a organisá diferente anochi di ‘Taste of Bonaire’ na New York City pa konsumidó, medionan di komunikashon i partnernan komersial, komo parti di su strategia di ‘Culinary Capital’ pa 2023 i reposishonamentu di nos isla komo un paradiso kulinario.
A organisá e eventonan riba djamars 24 di yanüari, den kolaborashon ku Kòrsou i St Maarten. E enfoke tabata riba nos partnernan di e medionan di komunikashon mas importante ku ta konsistí di vários eskritor, redaktor i ‘freelancer’. E fiesta di amigu hulandes karibense tabata un eksperensia íntimo ku sorpresanan kulinario, historia i e último informenan aktual di e islanan. TCB a invitá e talentoso shèfkòk boneriano Chelsey Domacasse, ku a tuma e inisiativa di prosesá nos famoso stobá di kabritu, funchi i pika krioyo den e eksperensia kulinario. Shèfkòknan talentoso di e tres islanan a prepará e sena kompleto kaminda e énfasis tabata riba ingredientenan lokal, kushinamentu ‘live’ i interakshon.
Riba djárason 25 di yanüari Boneiru, den kolaborashon ku Kòrsou, a organisá un ‘trade dinner’, kaminda nan a invitá agentenan di biahe di den region di New York City pa gosa di un eksperiensia úniko di sena.
‘Ta bunita pa eksperensiá e sinergia i kolaborashon entre St Maarten Tourist Board, Curacao Tourist Board i TCB. Nos ta kere fielmente den kolaborashon i ‘partnership’ pa inspirá mundu pa bishitá un di e islanan hulandes karibense. Personalmente tabata fantástiko pa mira nos talento kulinario Chelsey den akshon, loke ta konfirmá nos vishon pa promové Boneiru komo Culinary Capital’, segun Miles Mercera, direktor di TCB. #Itsinournature
Dia 26 di yanüari TCB a partisipá tambe na e 2023 Travmedia’s International Media Marketplace (IMM). IMM ta e evento mundial prominente di ret ku ta trese e industria di biahe den kontakto ku periodistanan tòp, redaktornan, ‘influencers’ i lokutornan. TCB, den kolaborashon ku Diamond PR (e ofisina di relashonnan públiko di Boneiru) a organisá henter e siman komo parti di su plan di akshon pa 2023. Durante e evento di IMM Boneiru tabatin oportunidat pa kompartí e informenan mas aktual di nos isla, manera e programa di Bonaire Bond, e Bonaire Yoga & Wellness Week, Bonaire Rum Week, aktualisashonnan tokante ‘airlift’, aktividatnan nobo, akomodashonnan i mas.
