KRALENDIJK,Bonaire
Boneiru ta bai traha mas estrechamente huntu ku e ret Hóben, sa bo peso adekuá (Jongeren op Gezond Gewicht – JOGG). Esaki ta resultado di un bishita di trabou ku e direktor di Direktorado di Komunidat i Kuido, sra Silvana Janga-Servilia i e hefe di departamentu di Salubridat Públiko, sra Alcira Janga-Jansen a hasi na Den Haag. Durante e bishita di trabou meimei di luna di febrüari e direktor i e hefe a sera konosí ku e direktor nobo di JOGG, Marjon Bachra. Na aña 2019 diputado Nina den Heyer i sekretario di estado Blokhuis a firma un Akuerdo pa Deporte i Prevenshon (Sport en Preventie Akkoord). E koperashon mas estrecho entre JOGG i Boneiru ta resultado di e akuerdo aki.
JOGG (Hóben, sa bo peso adekuá) tin komo meta pa stimulá hóbennan pa biba mas salú. E énfasis ta riba alimento salú, sufisiente moveshon, rekreashon i drumimentu. JOGG ke pa tur mucha i hóben krese i lanta den un ambiente salú. For di luna di òktober 2013 ofisialmente Boneiru a bira un ‘munisipio JOGG’ i nos isla ta haña sosten di e ret aki.
Na aña 2019 ya kaba a pone sierto pasonan pa yega na un koperashon mas estrecho. Por ehèmpel for di novèmber 2019 tin un konsehero di JOGG na Boneiru. E konsehero ta sostené Boneiru i ta duna konseho tokante e manera pa yega na un estilo di bida salú pa nos hóbennan i muchanan na Hulanda Karibense. E meta ta pa konhuntamente ku tur organisashon yega na un atendementu korekto pa muchanan ku sobrepeso i obesidat.
