INDEBON, den kolaborashon ku Fundashon Wega di Number Boneiru (FWNB) i Tourism Corporation Bonaire (TCB), ta organisá un eksitante evento den forma di un di dos edishon pa e sektor di deporte, bienestar i salú di Boneiru.
E eventonan durante e siman di deporte ta tuma lugá for di 21 di mart te kuminsamentu di aprel. Tur kos ta kuminsá riba djaweps ku un seremonia di apertura na Casa Bizarro, huntu ku e partnernan responsabel. Durante e siman akí e komunidat aktivo di Boneiru ta bini dilanti i nos isla ta posishoná su mes komo destinashon deportivo pa nos poblashon lokal i pa nos bishitantenan.
E programa di ‘Bonaire International Sports Week’ ta tuma lugá riba henter nos isla i ta ofresé un variedat amplio di aktividat deportivo. For di torneonan lokal te kompetensianan i klínikanan internashonal, e meta ta pa enbolbí un públiko mas amplio i stimulá partisipashon na e hopi eventonan deportivo durante e siman akí. Banda di esaki e plataforma ta brinda atletanan lokal oportunidat pa demostrá nan talentonan.
E wikènt binidero ku ta kuminsá dia 22 di mart, ta primintí di bira vibrante ku vários aktividat. E torneonan di ABC beachvolleyball ta kuminsá den Stadion di Playa i nan lo ofresé un demostrashon eksitante di deportivismo. Entretantu e amantenan di ABC Beach Tennis por spera e kompetensianan riba e vèlt tras di Budget Marine. Fanátikonan di sòftbòl por akudí na Jossy Boekhoudt Ballpark pa algun wega hopi animá, miéntras amantenan di pickleball por disfrutá di nan deporte na Kompleho Deportivo Jorge Nicolaas.
E wikènt akí i e wikent siguiente tin futbòl riba Vèlt Sylvio “Chio” Semeleer. Banda di esaki tin vários aktividat durante e siman binidero: ABC biar ku nan ta organisá den Kompleho Deportivo Jorge Nicolaas, un kompetensia di landamentu ku ta dura 4 dia i ku ta tuma lugá na Parke Tului Domacasse, TIRABON riba e kancha di tiramentu Arthur Enrique Mauricio i Xtreme Mountain Bikers. Durante henter siman e Xtreme Mountain Bikers lo duna klínika na nos skolnan, ku komo punto kulminante un evento den e wikènt despues.
‘Bonaire International Sports Week’ ta atraé bishitantenan i nos poblashon lokal ku e intenshon pa mustra nan entusiasmo deportivo. Miéntras e evento ta konsistí prinsipalmente di diferente kompetensia i klínika, e ta kulminá den un Kaminata i Kareda di Pia inklusivo, di kua nos ta anunsiá e detayenan mas despues i kaminda tur hende ta keda invitá pa partisipá.
Mas aktualisashon i informashon lo ta disponibel riba e plataformanan di medionan di komunikashon di e diferente klupnan enbolbí.
