Ku klasifikashon den diferente kategoria, entre otro 6 biaha puesto number 1
Den su edishon di luna di novèmber 2022 Scuba Diving Magazine a anunsiá e 2023 Readers’ Choice Awards. Boneiru a haña rekonosementu den 13 kategoria.
Kasi 6000 sambuyadó rekreashonal a partisipá na e di 30 enkuesta di Readers’ Choice di Scuba Diving Magazine pa skohe e mihó destinashonnan pa sambuyá na mundu. A konta e votonan den diferente kategoria a base di e destinashonnan pa sambuyá ku nan a bishitá durante e último dos aña. E reputashon ku Boneiru tin komo paradiso di sambuyamentu ta keda dominá e mundu di buseo. Nos isla a gana 13 diferente premio den e 2023 Readers’ Choice Awards, entre otro 6 puesto number 1. Pa di 30 aña tras di otro Boneiru ta mantené su supremasia komo e destinashon number 1 pa shore diving den region karibense i atlántiko. Nos isla a konkistá e promé lugá den sinku otro kategoria regional tambe, entre otro Best Beginner Diving, Best Macro Life, Best Snorkeling, Best Health of Marine Environment i Best Underwater Photography.
Banda di esei Boneiru a risibí un klasifikashon di Readers’ Choice pa Best Value, Advanced Diving, Big Animals, Wreck Diving, Wall Diving, Best Overall i Cave, Cavern and Grotto.
Miles B M Mercera, direktor di Tourism Corporation Bonaire ta bisa: ‘Nos ta selebrá esaki komo komunidat, pasobra e ta un rekonosementu pa e trabou duru i e esfuersonan riba tereno di medio ambiente ku diferente partner na nos isla a hasi pa mantené Boneiru ‘Blue’ ku enfoke riba nos vishon pa sostenibilidat. Nos no ta konsiderá esaki solamente komo un premio, pero tambe un rekonosementu di loke ta berdaderamente importante pa nos, esta e sinergia i amor entre mama naturalesa i e naturalesa humano. Na nòmber di nos tur: masha pabien! Pa di 30 aña konsekutivo ku Boneiru ta haña rekonosementu komo e destinashon number 1 di shore diving den region karibense i atlántiko. #Diversparadise’
Ta publiká e 2023 Readers’ Choice Awards riba www.scubadiving.com i den e edishon di luna di novèmber di Scuba Diving Magazine 2022.