Un ‘mediaplan’ ku enfoke internashonal ta sostené e kampaña akí, inkluso un kolokashon grandi riba Times Square na New York
Boneiru, un isla di Hulanda Karibense, awe a anunsiá lansamentu di su kampaña nobo pa turismo, ‘It’s In Our Nature’, ku un identidat nobo di marka. Un ‘mediaplan omnichannel’ pa alkansá bishitantenan eko-konsiente riba henter mundu ta sostené e kampaña.
Boneiru tin un mishon eko-séntriko úniko. Nos ta e promé isla den área karibense ku un parke marino protehá i nos ta boga pa un programa di sertifikashon di Blue Destination ku ta pone sostenibilidat, desaroyo ekonómiko i kultura na prome lugá den kaso di aktividatnan pa destinashonnan ku ta keda na laman.
E kampaña nobo titulá ‘It’s In Our Nature’ ta ekspresá a apresio ku Boneiru tin pa tur loke nos isla tin di ofresé: e kalor di nos hendenan i e sintimentu ku un vakansi ta laga atras serka biaheronan. Nos isla mes a inspirá e estilo ku ta kontené influensia di moda ‘high-end’, sine klásiko i álbùm ku por haña rònt mundu den tur kas. Ora ku kombiná nan, e elementonan akí ta posishoná nos isla Boneiru komo un sitio ku ta otro for di tur sobrá: un pèrla natural den área karibense ku un hende mester eksperensiá pa e por kere.
E proseso a kuminsá kasi un aña pasá na momentu ku Tourism Corporation Bonaire a skohe un partner, Dunn & Co., pa guia un proseso ku ta dura vários luna, inkluso strategia di marka, desaroyo di un ‘look & feel’ i un identidat visual nobo, produkshon di fotografia i videografia, konstrukshon di un wèpsait nobo, renobashon di karakterístikanan di medionan sosial, un konsepto di kampaña i un strategia di planifikashon i kompra pa loke ta trata medionan di komunikashon.
Mas lat den 2022 na diferente manera e kampaña lo haña forma na Merka, Oropa i den área karibense. E kolokashonnan den medionan di komunikashon ta enserá un presentashon digital grandi den espasio públiko riba Times Square, kontenido via medionan sosial i ‘social influencer’, ‘display’ digital, ‘paid search, pre-roll, streaming television, native advertising’ i ‘strategic content partnerships’ ku e mihó publikashonnan den industria di biahe.
“E marka nobo i e kampaña nobo ta kapturá e magia di nos naturalesa i di nos hendenan di Boneiru. Komunikashon ta tuma lugá pa medio di produkshonnan ku ta hala atenshon i un forma stratégiko pa konta dikon Boneiru ta un destinashon tòp pa biaheronan eko-konsiente”, segun Miles Mercera, direktor di Tourism Corporation Bonaire. “Nos ta anhelá pa bisa ‘Bon Biní!’ na tantu bishitantenan nobo komo bishitantenan ku ta bini bèk i ku ta entusiasmá pa eksperensiá nos kultura, pa sostené nos hendenan i pa protehá nos isla.”
