Komo parti di e strategia di komunikashon pa tene komunidat i bishitantenan bon na altura
For di 1 di yüli 2022 tur no-residente i bishitante di Boneiru mester paga e Visitor Entry Tax, un remplasante di loke tabata konosí komo ‘roomtax’ i ‘cartax’ di nos isla. Bishitantenan di 13 aña bai ariba tin ku paga USD 75 pa persona pa bishita i bishitantenan di 12 aña i mas chikitu i habitantenan di e anterior Antia Hulandes tin ku paga USD 10 pa persona pa bishita. Habitantenan di Boneiru ku un sédula bálido di Boneiru no tin mester di paga e Visitor Entry Tax. Por paga e impuesto obligatorio akí for di fin di luna di yüni digitalmente riba www.BonaireIsland.com òf na yegada na aeropuerto.
Komo parti di e strategia di komunikashon pa informá stakeholder, partnernan, bishitantenan den futuro i komunidat di Boneiru tokante implementashon i progreso di e Visitor Entry Tax, Tourism Corporation Bonaire (TCB) lo organisá vários seshon di informashon. Djabièrnè binidero 17 di yüni e seshon pa stakeholder i partner ta tuma lugá. Den e siman di 20 di yüni diferente seshon di informashon ta tuma lugá pa kompanianan di aviashon, agentenan di biahe, agensianan di biahe online (OTA) i mas, inkluso seshonnan di treinen.
Preguntanan hopi hasí i nan kontesta den FAQ
Un otro strategia di komunikashon ta uso di un página ku preguntanan hopi hasí (FAQ). TCB den kolaborashon ku Entidat Públiko Boneiru (OLB) a lansa un página di FAQ riba e wèpsait www.BonaireIsland.com ku kontesta riba e preguntanan ku ta bini dilanti mas tantu biaha. E página ku preguntanan hopi hasí ta di gran importansia, pasobra hasiendo uso di esaki bishitantenan mes por haña informashon den un forma rápido. Akí bou tin dos ehèmpel di pregunta ku ta bini mas tantu biaha dilanti i ku diariamente tin hende ta hasi.
Kiko ta e Visitor Entry Tax?
E Visitor Entry Tax ta remplasá loke anteriormente tabata konosí komo ‘roomtax’ i ‘cartax’ di nos isla. No-residentenan di 13 aña bai ariba ta obligá pa paga e Visitor Entry Tax di USD 75 pa persona pa bishita. No-residentenan di 12 aña i mas chikitu i habitantenan di e anterior Antia Hulandes ta obligá pa paga e Visitor Entry Tax di USD 10 pa persona pa bishita.
Mi a paga e ‘roomtax’ i e ‘cartax’ adelantá pa despues di 1 di yüli 2022. Mi ta haña e parti di e impuesto ku mi a paga adelantá bèk?
Si. Bishitantenan ku a paga e ‘roomtax’ òf e ‘cartax’ adelantá pa despues di 1 di yüli, mester pidi e hotèl òf e kompania di hür outo pa paga nan e impuesto bèk ku nan a paga pa despues di 1 di yüli 2022.
Pa mas informashon òf pa wak e página ku pregunta hopi hasí, bai riba: www.BonaireIsland.com.
