Den Reino hulandes tur aña riba promé di yüli ta konmemorá ku a abolí sklabitut. Sekshon di Kultura, Arte i Literatura (SKAL) huntu ku departamento Komunikashon i Protokòl e aña akí a fasilitá den un grupo di trabou di Entidat Públiko Boneiru un kompetensia di poesia bou di alumnonan di skolnan básiko, tokante e nifikashon di libertat. Riba 30 di yüni 2021 a entregá e promé premio i un trofeo eskolar na Djuga van Voorn di grupo 8A di Skol Amplio Papa Cornes. E promé i di dos finalistanan tabata respektivamente Mauro Cicilia di Skol Básiko Aquamarin i Andrika Rowe di Kolegio San Luis Bertran. E kompetidornan a duna di konosé ku nan a haña inspirashon for di mayor- i maestronan. E poesianan ta demostrá konsientisashon i empatia pa e doló, emansipashon i labor infantil fòrsá di awendia. Entidat Públiko Boneiru i SKAL ta gradisí e skolnan pa nan partisipashon.
Pa kanadónan FuHiKuBo a organisá un kaminata históriko ku Boi Antoin i deklamadó, Jeaniro Dorothea. Tabata un evento bon bishitá ku mas di 40 persona di diferente desendensia kultural i edat. Boi Antoin a guia e kanadónan den skuritu for di Pos di Cuba pa e lanthùis skondí, Yato Baco. Meimei di yatu- i ramanan el a konta tokante historia di e sitio i a papia ampliamente tokante sklabitut na Bonaire i e akontesimentunan rònt di su abolishon. Ounke ku e luna yen no laga mira su mes bon, tabata un anochi interaktivo eksitoso, kaminda e oudiensia tabata kologá na lepnan di e oradónan. Sr. Dorothea, konosí di e kompetensianan di ‘Arte di Palabra’ a deklamá un poesia tokante sklabitut i pordon. Un momentu honorabel di rekonosementu tabata ora a lesa nòmber di antepasadonan sklavisá ku durante e liberashon a haña nan libertat na Yato Baco.
Riba promé di yüli tabatin presentashon di un dokumentario den e bario Tera Kòrá. A kuminsá e anochi ku tene un minüt di silensio, pa konmemorá e fecha promé di yüli. E grupo di trabou a laga traha un mini dokumental den kua ta entrevistá siudadanonan boneriano tokante sklabitut i su abolishon i a pasa esaki tambe na e anochi. Despues di e dokumentario‘Sombra di koló’ di antropólogo Angela Roe, a sigui un kombersashon entre públiko, kaminda hendenan a fosiferá nan mes tokante e tema kiko e ta hasi ku nan personalmente. Grupo Ashé a deleitá e públiko for di kuminsamentu te final. E grupo di trabou ta wak bèk na un trayekto bunita i ta bai prepará pa futuro eventonan pa ku e tema aki. E grupo di trabou ta konsistí di empleadonan públiko di entidat públiko, di gobièrnu sentral i representantenan di instansianan kultural di Boneiru. Por wak e produkshon sinematográfiko di tres minüt ku suptítulo na papiamentu i ingles riba Youtube bou di e nòmber “Brasa bo libertat, pa e por resoná”
1 comment