Ku e regreso resien di buelonan nòn stòp di kompanianan
aéreo grandi, Boneiru a konosé un oumento fuerte den kantidat di bishitante den e di dos mitar
di aña 2021. Nos isla a anunsiá vários eksperensia nobo i atraktivo pa aña 2022 i segun
ekspektativa e aña akí nos lo yama bon biní na mas tantu biahero ainda. Nos isla ta sigui enfoká
riba sostenibilidat, un trènt ku semper Boneiru a kana dilantu kuné, i ta pidi bishitantenan di
nos isla pa anda ku koutela na momentu di eksplorá bunitesa natural di e Blue Destination akí,
tantu riba komo bou di nivel di laman. Den e aña nobo akí nos ta malkriá wéspetnan di Boneiru
ku aspektonan adishonal nobo nobo, akomodashonnan renobá i hopi manera pa alsa i mehorá
kalidat di nan eksperensia na nos isla, for di aventuranan den aire liber te platonan kreativo.
E aña nobo akí ta marka un komienso nobo pa Miles B M Mercera, direktor di Tourism
Corporation Bonaire, ku a haña su nombrashon den luna di yüli último. ‘Nos ta preparando pa
loke ta bai bira un aña eksitante pa e destinashon’, segun Mercera, ku durante e lunanan
binidero lo presentá un strategia nobo di marka. ‘Aunke nos mundu bou di laman semper lo
keda un atrakshon, nos ta ofresé un kantidat grandi di eksperensia ku ta agradá vários tipo di
biahero, entre otro establesimentunan mehorá pa kome i akomodashonnan mas luhoso pa
kumpli ku pedida di biaheronan mas sofistiká i mas konsiente di medio ambiente ku mas i mas
ta deskubrí Boneiru.’
Apertura nobo i binidero
Akomodashon
Chogogo Dive & Beach Resort Bonaire ta un risòrt nobo nobo kantu di laman, adekuá pa famia,
ku tabatin su apertura dia 1 di desèmber 2021. E risòrt situá kantu di laman ta ofresé fasilidat di
4 strea ku 196 apartamento, sinku vila, dos restorant i un kanal di awa ku ta kore estilo ‘lazy
river’ ku ta konektá e dos pisinanan di e akomodashon ku otro. Segun ekspektativa ta finalisá
henter e proyekto akí dia 31 di mart 2022.
Bloozz Resort Bonaire ta yega nos isla den e di dos mitar di 2022. E risòrt nobo akí ku tres
edifisio ta alohá 46 studio i apartamento, e ta disponé di un pisina di magnesio ku un bar
inkorporá den e pisina.
Na e momentunan akí e doñonan di Resort Bonaire ta konstruyendo Sunset Beach Resort , un
hotèl nobo ku 106 apartamento i pènthous luhoso den estilo di arkitektura boneriano, un pisina
grandi ku kama pa drumi ariba, un bar na bich, un restorant i un
kasino. Segun ekspektativa e risòrt lo tin su apertura na aña 2023.
Delfins Beach Resort , un di e akomodashonnan kantu di laman mas popular na Boneiru, den
luna di yanüari tin apertura di un edifisio multifunshonal di 1800 m², ku un espasio moderno pa
konferensia i reunion, un sentro di fitness i wellness i un restorant asiátiko nobo.
Restorant i Bar
Hofi Restaurant Bonaire a habri su portanan den e di dos mitar di aña 2021. Hòfi ta sirbi bibida
‘premium’ i platonan ku bo por kompartí konhuntamente, den e ambiente íntimo di un hòfi den
un patio.
E bar di kòktel ku hopi a spera, Tiki & Co. , situá den kurason di Kralendijk, a habri su portanan
na kuminsamentu di aña 2021. E bar di kòktel moderno i eksótiko di e aklamado Sir Eddy
Trenidad ta sirbi su wéspetnan kòktel kontemporáneo i artesanal ku un toke tropikal.
Na luna di desèmber 2021 Delfins Beach Resort a habri un restorant nobo nobo ku kushina
asiátiko, Senang Bonaire . Inspirá pa nan eksperensianan inolvidabel durante nan biahenan na
Asia, e doñonan di restorant Jonnie i Thérèse Boer ta invitá wéspetnan pa sinti nan mes
‘senang’ den nan bar/restorant mas nobo den un ambiente ku influensia asiátiko, úniko na nos
isla.
E shèfkòk nasé na Venezuela Juan de Sousa a habri un tienda gastronómiko den
C'est La Vie Gourmet ku platonan liviano manera salada, produkto di karni, biña, panini, sòpi i
mas.
Den sentro komersial South Pier na Kralendijk a habri Sakura Sushi Bar , wéspetnan por gosa di
sushi outéntiko i fresku ku un bahada di solo fantástiko den bèkgrount.
E restorant nobo na bich Azure at Eden Beach situá riba tereno di Eden Beach Resort ta habrí
awor i ta ofresé wéspetnan un ambiente kómodo pa konhuntamente gosa di solo, laman, bich i
un delisioso menú.
Den kurason di Kralendijk Grandi , un bar di biña i restorant nobo a habri su portanan dia 7 di
desèmber. E bar nobo akí ku kushina italiano ta ofresé produkto lokal fresku, kombiná ku un
selekshon di biña kuidadosamente komponé den un esfera ameno.
Situá den Kaya Grandi na Kralendijk bo ta haña La Otra Vaina , ku resientemente a habri su
portanan i ku den tempu korto a bira e hòtspòt mas popular pa bida nokturno. E ta ofresé bon
músika, bibida refreskante i diferente anochi temátiko pa ora bo sali pa gosa di un dushi anochi.
Aventura i eksperensia nobo
Bonaire Landsailing Adventures a uni forsa ku Cave Tours Bonaire pa un ‘combo-tour’ di
aventura pa eksperensiá un dia inolvidabel i aventurero. Durante un rekorido pa bishitá kueba e
bishitantenan di nos isla ta bai eksplorá e mundu bou di tera di Boneiru i siña mas tokante e
kuebanan úniko di nos isla for di un guia lokal spesialisá. Seguidamente tin e posibilidat pa gosa
di e sensashon di ‘landsailing’ riba un blokart riba tera. Ademas, den aña 2022 Bonaire
Landsailing Adventures lo amplia su oferta ku seshonnan durante anochi.
Cadushy Distillery , e úniko destileria na Boneiru a krea un ròm spesial den un edishon chikitu, e
Rom Rincón Limited Edition 2021. Ta un variante di e Rom Rincón, produsí lokalmente i ku a
keda koroná, prosedente for di stòk privá di e destiladó Eric Gietman. E ròm ekstraordinario akí
a hecha den barí chikitu i a haña kuido i atenshon èkstra pa optené un sabor suave i delisioso. E
ròm akí ta optenibel solamente durante un tempu limitá na The Cadushy Distillery i nan ta
paketá kada bòter den un kaha spesial pa hasi regalo.
E Harbour Village ikóniko i luhoso, situá na e úniko bich privá ku santu blanku na Boneiru, awor
akí ta ofresé un eksperensia di buseo bou di supervishon grátis na Great Adventures Bonaire, e
operashon di buseo na e sitio ei. Un supervisor personal di buseo ta disponibel durante henter
aña i ta sòru pa e ekipo di e wéspetnan for di check-in te na check-out, i e parti di karga,
deskargá i preparashon di e ekipo.
Esfuersonan di sostenibilidat
Komo parti di e aspirashon di nos isla pa yega na un ambiente di biba mas limpi i mas saludabel
ku ménos shushi riba kaya i den mondi, na luna di mart 2022 e prohibishon di plèstik pa un solo
uso, entre otro saku di plèstik, pipa pa bebe kuné, kos pa drai bibida kuné i kuchú, forki i
kuchara, ta bini na vigor na Boneiru.
Reef Renewal Bonaire , un grupo lokal ku ta konservá i restourá ref di koral na Boneiru pa medio
di enbolbimentu duradero di komunidat, for di su lantamentu te ku awor a produsí 2500
sambuyadó sertifiká pa renobashon di ref. Na aña 2021 a planta 7500 pida koral nobo i a repartí
nan entre e 10 sitionan di restourashon di koral na Boneiru. Aktualmente 80% di tur sentro di
buseo lokal na Boneiru ta partisipá na e programa di renobashon di ref di Reef Renewal
Bonaire.
Renobashon i reapertura
The Bonairian , konstruí originalmente na aña 1977, ta un butik hotèl luhoso kantu di laman ku
un bunita bista panorámiko riba e kapital Kralendijk. E ta kompletamente renobá i ta konsistí
awor di 8 kamber i un pènthous. Wéspetnan por hür henter e hotèl pa un eksperensia privá
optimal, inkluso transporte pa i for di aeropuerto, catering, e
aktividatnan ku nan ta ofresé i tambe akseso na un bich privá i un
espasio pa tene fiesta.
Sun Rentals a renobá diferente kas, entre otro Kas Koral , un kas den estilo tradishonal
boneriano ku ta popular serka tantu poblashon lokal komo turista. E kas ta ekipá ku tur luho i
komodidat i ta disponé di tres kamber di drumi i un terasa privá ku ta ofresé bistanan
impreshonante riba bahada di solo.
Wéspetnan por sambuyá ku komodidat i estilo na Toucan Diving , ku resientemente a añadí un
katamaran di 11,5 meter largu i trahá na midí na su fleta. E boto nobo ta ideal pa sambuyá i
snòrkel, pero e ta disponibel tambe pa un ‘partycruise’ na bahada di solo, paseo durante dia i
charter privá.
Durante temporada haltu Washington Slagbaai Park ta habrí te 2 di febrüari durante 7 dia pa
siman. E orario ta keda sin kambio for di 08.00 or te 17.00 or.
Despues di tabata será durante un aña pa motibu di Corona, e Cactus Blue Food Truck favorito
ta bèk. Cactus Blue ta ofresé e famoso Lion Fish Burgers i diariamente djus di fruta fresku; e
foodtruck akí ta situá na Donkey Beach.
E kompania di hür outo Avis Bonaire tin un ofisina prinsipal nobo, situá na aeropuerto
direktamente na man drechi banda di salida. E ofisina nobo ta disponé di un sala di espera, un
huki pa mucha, tualèt i e ta kompletamente airekondishoná.
Den e lunanan tras di lomba Boneiru a añadí e disponibilidat di test antigéniko rápido na nos
aeropuerto Flamingo International Airport pa yuda biaheronan pa kumpli ku e protokòl aktual
di test di COVID-19. E protokòl akí ta eksigí ku mester tin un resultado negativo di e tèst
antigéniko hasí dentro di 24 ora promé ku salida, òf un resultado negativo di e tèst di PCR hasí
dentro di 48 ora promé ku salida pa Boneiru. Pasaheronan ku no ta bakuná mester mustra
prueba di un test di PCR negativo ku nan a hasi dentro di 48 ora promé ku salida. E tèst
antigéniko hasí na e sitio mes ta duna resultado dentro di 15 minüt.
Bishitá BonaireCrisis.com pa e protokolnan di COVID i eksigensianan di biahe mas resien.
