Boneiru ta anunsiá un skema di buelo nobo i mas amplio pa e temporada di wenter binidero

Un informe di Tourism Corporation Bonaire

Tourism Corporation Bonaire (TCB) ta anunsiá e skema di buelo pa e temporada di wenter 2023 – 2024 ku mas buelo nobo i vários ‘gateway’ adishonal.

Te 16 di desèmber 2023 Delta tin un buelo semanal planiá riba djasabra pa Boneiru for di Atlanta, Georgia, i nan ta amplia e buelo semanal akí i hasié kuater buelo pa siman for di 16 di desèmber 2023 te 6 di aprel 2024. E buelonan ta riba djaluna, djamars, djaweps i djasabra.

E skema di buelo aktual di American Airlines for di Miami, Florida ta keda henter aña na vigor ku buelo riba djaluna, djárason i djasabra. Pa e lunanan di sèptèmber, òktober i novèmber te ku 9 di desèmber AA ta bula riba djárason i djasabra. For di 11 di desèmber 2023 te ku aprel 2024 nan buelonan ta riba djaluna, djárason i djasabra. 

E buelo for di Newark, New Jersey ku United Airlines lo stòp 13 di ougùstùs i lo reanudá dia 4 di novèmber 2023, miéntras ku e buelonan for di Houston, Texas ta keda operashonal durante henter aña ku un buelo semanal pa Boneiru riba djasabra i ku e buelo di regreso riba djadumingu.

Resientemente nos isla a anunsiá tambe e buelo nònstòp for di Toronto, Canada ku WestJet. E skema di buelo ta kuminsá dia 12 di desèmber i ta kontinuá te meimei di luna di aprel ku buelonan semanal riba djamars i ku e buelo di regreso riba djárason.

Boneiru a introdusí un biaha mas tambe dos buelo semanal for di i pa Sint Maarten ku Winair ku un eskala na Kòrsou riba djaweps i djadumingu. 

For di luna di novèmber 2023 TUI ta introdusí buelo nònstòp (AMS – BON) pa nos isla durante sinku dia pa siman. For di Hulanda KLM ta sigui bula diariamente pa Boneiru for di Amsterdam.

E partnernan lokal di aviashon EZAir i Divi Divi Air ta mantené nan skema di buelo ku kapasidat èkstra durante e lunanan ku ta mas drùk.

E buelonan èkstra ya kaba ta online i por hasi reservashon pa e temporada di wenter binidero. 

Pa mas informashon, bishitá e wèpsait di bo kompania di aviashon faborito òf manda un email na: marketing@bonaireisland.com.