Mas buelo pa mehorá konektividat i stimulá turismo durante verano
Tourism Corporation Bonaire (TCB) ta kontentu di por anunsiá un ampliashon di su skema di buelo for di Miami ku American Airlines (AA) durante luna di yüni i yüli 2024.
Despues di e lansamentu eksitoso di mas buelo den temporada di wenter, kaminda AA te ku luna di aprel 2024 ta ofresé tres buelo pa siman (riba djaluna, djárason i djasabra), ku orguyo TCB ta presentá un impulso èkstra den konektividat pa e temporada di verano. Den luna di yüni i yüli 2024 AA ta ehekutá tres buela pa siman for di Miami pa Boneiru, pa medio di agregá un dia èkstra na e skema di verano, kambiando esaki di djárason i djasabra pa djárason, djabièrnè i djasabra.
Miles Mercera, direktor di TCB a ekspresá su entusiasmo: “Nos ta kontentu ku nos por kontinuá ku nos kolaborashon ku American Airlines i hasi Boneiru mas mihó alkansabel. E buelonan ku ta bai oumentá durante e lunanan di verano ta suprayá nos dedikashon pa ofresé biaheronan mas fleksibilidat i mas posibilidat pa eksperensiá e bunitesa i e oferta úniko di Boneiru.”
Pa mas detaye i pa reservá bo buelo, bo por bishitá wèpsait di AA riba www.aa.com òf manda un email na marketing@bonaireisland.com.
