Nos isla ta introdusí ‘Bonaire Bond’ pa stimulá konsiensia i inisiativanan rònt di sostenibilidat i riba Dia di Mama Tera (Earth Day) ta kuminsa un kampaña korespondiente di renobashon di ref durante un aña
Tourism Corporation Bonaire (TCB) ta anunsiá lansamentu di ‘Bonaire Bond’, un promesa di destinashon bon pensá ku ta invitá bishitantenan pa biaha na un manera responsabel i pa respetá nos isla. E meta di e akshon pa laga bishitantenan firma un promesa ta pa konservá e forsa di atrakshon natural di Boneiru pa e añanan binidero. A desiñá e ‘Bond’, e konbenio, pa rekòrdá tur hende kon krusial turismo sostenibel ta pa e ambiente di biba di e komunidat lokal. Nos isla ta bai un paso mas aleu den su esfuersonan pa naturalesa ku un invershon nobo den konservashon di naturalesa via e fundashon Reef Renewal Bonaire pa medio di adoptá palu di koral na nòmber di e bishitantenan ku ta firma e konbenio. E palunan di koral akí kada unu ta kria mas ku 100 pida koral, e donashon pues ta bai direktamente bèk pa rekuperashon di e refnan di Boneiru. Bishitantenan ku for di Dia di Mama Tera, dia 22 di aprel 2022, a pone nan firma bou di e konbenio, ku esaki pues ta kontribuí aktivamente na konservashon di e ekselente bida bou di laman ku nos isla ta konosí p’é.
Den e promesa ta pidi bishitantenan pa respetá nos medio ambiente, pa tene kuenta ku nos naturalesa i pa ta konsiente di nos komunidat lokal i su laso sólido i duradero ku su alrededor. E konbenio ta sirbi tambe komo un hèrmènt edukativo i un manual pa komportashon responsabel na nos isla. Riba e wèpsait www.BonaireBond.com bishitantenan di nos isla ta keda enkurashá pa no solamente firma e promesa digitalmente, pero naturalmente pa kumpli ku esaki tambe.
Boneiru no solamente ta e promé Blue Destination na mundu, pero alabes un Green Destination sertifiká i ganadó di un premio di Quality Coast, ámbos rekonosé pa e Global Sustainable Tourism Council – Konseho Mundial di Turismo Sostenibel. Boneiru ta sigui desaroyá su mes den harmonia ku su ambiente natural i ku mantenshon di su outentisidat kultural i su bunitesa puro. ‘Nos isla ya kaba tabata dediká su mes na sostenibilidat hopi promé ku esaki a bira algu komun’, asina Miles B M Mercera, direktor di TCB a bisa. ‘Esaki semper tabata den nos DNA. Na aña 1979 Boneiru tabata e promé isla karibense ku a indiká 100% di e laman rònt di nos komo parke protehá bou di laman. Banda di esei 20% di nos tera, e base di nos founa, kadushinan i bichnan lokal, ta kai dentro di e fronteranan protehá di Washington Slagbaai, e parke nashonal mas bieu di e anterior Antia Hulandes for di 1969.’
Mas ku 50 aña despues mas amante di tera, laman i naturalesa ku nunka ta deskubrí e isla chikitu akí ku 21.000 habitante, ku ketu bai ta kas di miles di flamingo i no tin ningun lus di tráfiko. Segun ku Boneiru ta krese den popularidat, nos isla ta hasi esfuerso pa anda konsientemente ku esei pa medio di atraé bishitantenan for di rònt mundu ku ta mes konsiente i ku ta en buska di un eksperensia outéntiko.
TCB lo usa vários kanal pa informá bishitantenan i enkurashá nan pa hasi esfuerso pa e ‘Bonaire Bond’, e konbenio boneriano. TCB ademas lo tuma kontakto aktivamente ku empresanan i habitantenan lokal pa djòin e movementu i para komo ehèmpel i duna bèk na nos isla pa medio di konservashon di e refnan di koral bunita i vulnerabel di Boneiru.
