Resientemente Tourism Corporation Bonaire (TCB) a partisipá na e Travmedia’s International Media Marketplace (IMM) pa aña 2022. IMM ta e prestigioso evento mundial di ret ku ta konektá e industria di biahe ku periodistanan tòp, redaktornan, influensiadónan i kanalnan di radio i televishon. TCB, den koperashon ku Diamond PR (e agensia di relashonnan públiko pa Boneiru), a partisipá na e eksitante evento akí pa kompartí e aktualisashonnan mas resien di Boneiru i presentá esakinan pa publikashon den medionan di komunikashon mas destaká.
‘E strategia di posishonamentu mundial di Boneiru ta sumamente dependiente di nos esfuersonan di PR. Resientemente na nòmber di Boneiru TCB a logra bunita resultadonan di PR ku ehekushon di proyektonan manera e programa di televishon ‘Het Perfecte Plaatje’ pa e merkado oropeo i ku publikashonnan tokante Boneiru ku por a mira den The New York Times, LATimes.com, ThePointsGuy.com, Parade.com, MSN.com i Brides.com, djis pa menshoná algun. Tur esaki ta resultado di e koperashon kontinuo ku partnernan di medionan di komunikashon internashonal’, segun Miles Mercera, direktor di TCB.
TCB a plania mas ku 24 sita individual i a informá nos partnernan di medionan di komunikashon tokante kon Boneiru ta desaroyá su mes, pero den harmonia ku hende i naturalesa. TCB a anunsiá tambe su enfoke pa 2022, inkluso pero no solamente limitá na enbolbimentu di nos komunidat. Ta trata di enfoke riba oumento di e bentahanan ku ta surgi for di desaroyo di turismo pa un segmento mas amplio di nos poblashon boneriano i riba turismo di balor haltu ku tiki impakto. Esaki ta enserá: redefiní Boneiru komo un destinashon ‘premium’ úniko, un manera pa hui for di strès di tur dia i hasi kontakto atrobe ku naturalesa. Nos strategia regenerativo koherente ta enserá: atraé e tipo di turista korekto – un kliente aktivo i próspero ku ta en buska di un produkto outéntiko i nos esfuersonan pa mehorá e eksperensia turístiko: pone énfasis riba nos kultura, nos arte kulinario i e diversidat di aventura riba tera i den laman di Boneiru.
TCB ta wak bèk riba un seri eksitoso di enkuentro ku lo resultá den diferente oportunidat pa Boneiru den aña 2022 pa loke ta trata medionan di komunikashon. Den koperashon ku Diamond PR den luna di febrüari TCB ta bai organisá un seshon di aktualisashon di PR pa keda na altura di e tendensianan i aktividatnan mas resien ku ta planiá pa 2022.
