Tourism Corporation Bonaire (TCB) tabata presente na e gala di biahe na Nijkerk, Hart van Holland, ku TRAVel Media a organisá. E tema di e aña akí tabata ‘proud to be in travel – orguyoso di ta den biahamentu’ i TCB tabata presente pa partisipá na e evento importante aki den sektor di biahe.
Durante e gala mas ku 470 invitado prominente ku ta traha den industria di biahe tabata presente.
Marjolein Oleana, Business Manager i Elesier Angel, Cruise & Project Coordinator TCB, tabata presente na e gala di biahe. Jaedan Crestian, un studiante Boneriano ku ta studia na Groningen, tambe tabata invitá pa sinta na mesa durante e gala di biahe. TCB ta haña ku ta di gran importansia pa inkluí i enbolbí nos hóbennan Boneriano ku eventonan i aktividatnan na Hulanda ku ta relatá na turismo.
E mesa di Boneiru tabata yená ku partnernan importante for di e sektor di biahe. Presensia di e partnernan akí tabata un indikashon di e lasonan sólido i kolaborashon ku Boneiru ta disponé di dje. TCB ke gradisí e partnernan akí pa nan dedikashon i aporte na kresementu i desaroyo di industria di turismo na Boneiru.
Den e aña binidero TCB ta spera di ta mas aktivamente presente na eventonan similar i di traha huntu ku otro partisipantenan den sektor di biahe pa promové i sostené turismo na Boneiru.
TCB ke gradisí TRAVel Media pa nan trabou duru i nan dedikashon pa hasi e anochi akí un éksito inolvidabel. Ta un honor pa tabata presente i nos ta anhelá e siguiente edishon.
