Detenshon pa menasa
Riba djamars 23 di aprel, alrededor di 9.20 or di anochi, a detené un hòmber di inisial A.C. riba Kaya
Mandolin pa menasa i violashon di Lei di Arma BES. E sospechoso tabata bou di influensia di alkohòl i
a kuminsá buska pleitu ku un dama. Durante e pleitu el a menasa e dama i a tira un bòter di serbes
den su direkshon. E bòter di serbes no a alkansá e dama i seguidamente e sospechoso a bandoná e
sitio. Un patruya a topa e sospechoso den bisendario i a detené. Durante di e detenshon a topa e
sospechoso ku un skrufdrai i un kuchú i a konfiská esakinan. Investigashon den e kaso ta kontinuá.
Kandela den instituto
Riba djaluna 22 di aprel, alrededor di 5.35 or di atardi, ‘meldkamer’ sentral a risibí notifikashon
tokante kandela den kamber di un instituto na Tanki Matrimonio. Na yegada di brantwer a konstatá
ku un kolchon den e kamber tabata na kandela. Brantwer tabatin e situashon bou di kòntròl i a paga
e kandela. No tabatin hende den e kamber. E patruya a tuma keho di pegamentu di kandela
intenshonal. Ta investigando e kaso.
Ladronisia di baiskel
Riba djabièrnè 19 di aprel a drenta keho di ladronisia di un baiskel koló kòrá di e marka Merida. E
baiskel no tabata na lòk i tabata stashoná banda di otro baiskelnan, na e fèlt di futbòl Rudy Boezem
na Nort’i Saliña. Riba djasabra 13 di aprel entre 5.30 or di atardi i 10 or di anochi, deskonosínan a bai
kuné. Ta investigando e kaso.
Ban selebrá Dia di Rincon na un manera seif i responsabel.
Dia di Rincon ta aserkando. Ta un temporada di fiesta i goso i pa e periodo aki tin basta evento i
aktividat planiá. A resultá ku e ora ei sa pèrdè e reglanan vigente i responsabilidat pa ku nos mes i
nos próhimo for di bista. Pero esaki no ta notifiká ku e reglanan ta ménos vigente.
P’esei polis lo ta mas tantu posibel visibel i presente riba kaya pa mantené òrdu i pa duna ayudo
kaminda ta nesesario. E aña aki tambe ku kamara di vigilansia komo proyekto piloto durante dia di
Rincon. Den kaso ku personanan kousa un estorbo pa órden públiko òf ta hasi nan mes kulpabel na
echonan kastigabel, lo evaluá ta di ki tipo di violashon(nan) ta trata i kua lo ta e mihó manera pa
atendé ku esaki, hasiendo esaki ku rèspèt mutuo. Lo no tolerá violensia ferbal i/òf agresividat kontra
agentenan bou di niun sirkunstansia ni tampoko opstrukshon di polis òf otro dunadó di ayudo den
ehersé nan funshon.
KPCN ke enfatisá ku ta esensial tambe pa bebe di manera responsabel i usa kùpnan re-usabel pa ko’i
bebe na lugá di glas òf bòter, asina bo ta prevení situashonnan peligroso. Si bo ta bebe, no stür:
traha un sita pa hiba bo kas. Mirando ku durante di e dia lo bo ta oranan largu for di kas, ta deseabel
pa sera bo kas bon i sòru pa bo kas tin sufisiente iluminashon ora bo sali. Stashoná bo outo na un
lugá seif, pero no tras di barikada i no laga kos balioso den outo. Sigui e rutanan stipulá i no move e
barikadanan i/òf bòrchinan ku ta indiká esakinan.
Pa finalisá polis ta hasi un yamada na un i tur pa mantené nan mes na e velosidat permití tantu den
área urbanisá (bebouwde kom, 40 km) i pafó di bebouwde kom ku ta e velosidat máksimo di 60 km
pa ora. Ademas ta urgi un i tur pa duna oido na eventual òrdu di polis. Asina nos por selebrá na un
manera seif i responsabel.
Kuerpo Polisial Hulanda Karibense ta deseá un i tur un felis Dia di Rincon!
