Mi ta kontentu ku danki na boso koperashon i bon komportashon, awe mi por anunsiá ku nos ta bai sigui suavisá e medidanan. Nos ta pasa entrante mayan 23 di aprel di nivel di riesgo sinku pa nivel di riesgo kuater. Entrante mayan tambe lo no tin toke de keda mas i no tin prohibishon pa bebe alkohòl den lugá públiko mas. E medidanan ta konta pa tres siman, pero naturalmente lo evaluá si por sigui suavisá mas trempan.
E kantidat di hendenan ku Covid-19 na Boneiru a baha drástikamente i ta premirá ku e kantidat lo sigui baha. Awe nos ta konta 34 kaso aktivo. Espesialmente e sifra di persona ku ta den hospital a baha, poniendo asina ménos preshon riba kuido médiko. E otro motibu pa suavisá e medidanan ta ku mas i mas hende den nos komunidat a bakuná i asina ta protehá kontra e virùs. Un djis mi ta duna mas detaye di e logro akí.
Nivel di riesgo kuater ta nifiká ku hopi kos ta posibel atrobe pero ku límite, pasó tur dia ainda ta konstatá kontagio ku e vírùs di corona. Mi ta menshoná en breve kiko algun di e medidanan na nivel di riesgo 4 ta enserá. Pa tur informashon i detaye wak riba www.bonairecrisis.com . Algun di e medidanan en breve ta: Ku Hendenan ku ta biba ku otro den kas por bishitá un otro kas ku un máksimo di dies hende. Negoshinan kaminda tin kontakto dirèkt ku kliente, manera kapsalòn i barbershop, por habri atrobe. Tur negoshi i pakus por ta habrí atrobe.
Establesimentunan di hóreka por ta habrí te 22 or i nan tin mag di sirbi alkohòl atrobe. Casino por ta habrí, kantor di number tambe i gym. Ta posibel tene misa i sirbishi. Tene kuenta ku na nivel di riesgo kuater kétubai tin regla i restrikshon! Wak esakinan riba www.bonairecrisis.com
Mirando ku ainda e vírùs di corona ta na nos isla i nos mester tene kuenta ku e variantenan, ainda no ta permití pa tene òf organisá evento. Esaki pa protehá nos mes pa nos no tin ku bai bèk na medidanan mas severo i un nivel mas haltu di riesgo. P’esei e aña akí nos lo no tin selebrashon di Dia di Rei i Dia di Rincon i tur otro festividat relashoná ku esakinan. Manera mi a menshoná siman pasá nos ta investigando sí pa wak si por tene evento komo tèst na un forma sigur den e periodo benidero.
Tin mientrastantu 11.416 hende ku a pasa nan di promé angua den nan tin 4.175 hende ku a haña e promé i e di dos angua. Ke men 60% di hende a pasa e promé angua kontra corona kaba. Nos komunidat a demonstrá di ta solidario ku otro. Pero nos no ta kla ainda. Mas tantu hende bai bakuná mas lihé nos por bai bèk na un bida normal. E siman akí i otro siman ta posibel pa pasa e promé angua kontra corona sin sita den bo bario mes. Si bo ta duda si bo ta bai bakuná , òf si bo tin pregunta, bo por pasa tambe na sentro di bario. Ta posibel pa pasa e promé angua sin sita na Fundashon Mariadal i Kompleho Deportivo Jorge Nicolaas. Pa mas informashon bishitá www.bonairecrisis.com òf yama 0800 0900.
Mi ke bolbe gradisí un i tur un biaha mas pa nan koperashon i komportashon i ta spera ku nos ta keda riba e bon kaminda.
1 comment