Ku orguyo Boneiru ta anunsiá ku nos isla a sali riba CNN.com. E artíkulo ta kompartí tur punto kulminante di Boneiru su prendanan skondí. E publikashon akí ta forma parti di e esfuersonan di relashon públiko (PR) di Tourism Corporation Bonaire.
E artíkulo ku e título ‘Bonaire: Why so many visitors want to move to this secret island – Boneiru: Dikon asina tantu bishitante ke muda pa e isla sekreto akí’, a sali dia 25 di yüli 2023 riba CNN.com i e outor ta Danielle Braff. Na luna di aprel 2023 Danielle a djòin un biahe di grupo pa prensa ku Tourism Corporation Bonaire a organisá den kolaborashon ku Diamond PR. El a skirbi a artíkulo akí den kua tur kos ta bini na vigor tokante sambuyamentu, Delfins Beach Resort, Parke Nashonal Washington Slagbaai, nos burikunan, nos santuario di flamingo i hopi mas. E artíkulo akí ta mustra e lesadó dikon Boneiru ta un isla ku mester ser deskubrí i eksplorá.
Riba e wèpsait e artíkulo tin alkanse online di 7.946.319 i el a keda publiká tambe den un ‘post’ individual riba e Instagram-account ofisial di CNN ku mas di 19 mion siguidó.
Tourism Corporation Bonaire, den kolaborashon ku su ofisina di relashon públiko Diamond PR, durante henter aña ta organisá vários biahe di grupo pa prensa i den esaki ta invitá diferente freelancer, influencer, periodista i blogger pa bin Boneiru. Meta di e bishitanan akí ta pa nan skirbi tokante nan eksperensia na nos isla. Esaki ta duna bishitantenan potensial un idea di kiko nan por spera ora nan bishitá nos isla i ta duna bishitantenan ku a yega di bishitá Boneiru kaba un aktualisashon di tur loke ta pasando. Nan publikashonnan ta varia di artíkulo te ‘blogpost’ i/òf ‘post’ riba kanalnan di medionan sosial. Di e manera akí Boneiru ta haña hopi atenshon riba algun di e kanalnan di medionan di komunikashon di mas konosí.