E interes pa e seshon ku Boneiru huntu ku Kòrsou i Local2030 Island Network a organisá djárason mainta na e Konferensia tokante Awa di Nashonnan Uní na New York, tabata hopi grandi. Entre otro gezaghèber Edison Rijna a duna un diskurso tokante maneho di awa na e islanan. Rei Willem-Alexander a asistí na e seshon.
Gezaghèber Rijna a mustra ku ya pa siglonan kaba, awa ta e ‘lifeline’, e ardu mayó, di e sosiedat boneriano, pero awor – komo konsekuensia di kambio di klima – ta forma tambe un menasa. “Fin di aña pasá nos a konfrontá e retonan di kambio di klima. Un parti grandi di nos isla tabata bou di awa, no por a hasi uso di kareteranan i kasnan a yena ku awa. Tur e awa sushi ku for di e isla a bai laman a afektá nos koralnan. For di investigashon resien ta sali na kla ku e añanan ku ta bini, nos komo Boneiru mester prepará nos mes seriamente. Kambio di klima i e konsekuensianan di esei, manera inundashon, lo tin un influensia grandi riba kon i hasta unda nos por biba riba nos isla.”
Kooperashon
Rijna a enfatisá den su diskurso tambe e importansia di traha huntu ku sosio i otro isla. “Kaminda ta posibel, nos por siña huntu kon nos por traha mihó ku awa, por protehá i defendé nos mes kontra awa i proaktivamente aktua kontra kambio di klima. Komo ku nos no por warda mas, Boneiru ya kaba a tuma e promé pasonan konkreto. Den konsultu estrecho ku e ministerionan kompetente na Hulanda nos a krea un Mesa di Klima.” Bon notisia
E gezaghèber a sita tambe e rapòrt den kua ekspertonan di Hulanda su departamentu di maneho di awa ta hasi rekomendashon pa maneho integral di awa i ku, asina el a ofresé, otro islanan tambe por usa pa arma nan mes kontra molèster di awa. Un di e otro oradónan di e seshon tabata e minister di Infrastruktura i Maneho di Awa Mark Harbers. E minister a bai New York ku bon notisia. El a anunsiá ku e ta bai yuda solushoná e problema di e saliña na Harbour Village, ku na novèmber a kousa asina tantu problema. Gezaghèber Rijna a palabrá ku e minister pa riba término korto tuma e medidanan nesesario pa evitá problema ku awa atrobe.
