Pa hopi aña kaba anualmente Boneiru ta keda sin risibí miónes, pa motibu ku kobransa via e sistema aktual di impuesto di turista i impuesto di hürmentu di outo ta laga di deseá. Ademas, pa akomodashon i kompania di hür outo ku ta kobra i entregá e impuesto korektamente, esaki ta kousa un sintimentu fuerte di kompetensia inhustu. Ku e sistema nobo ta ferwagt ku e entrada pa aña ta bira dòbel.
Método nobo
Ku e konsepto di ordenansa nobo ta proponé pa remplasá e impuesto di turista i impuesto di hürmentu di outo aktual ku un solo impuesto nobo di turista ku ta kobra kada persona ku no ta residente un biaha pa aña. Ta motivá bishitante pa paga adelantá online. Kontròl ta tuma lugá na aeropuerto i den haf, di manera ku e kumplimentu ta oumentá for di apénas 50% te kasi 100%. Ta ofresé e posibilidat tambe pa paga na yegada. Bentaha di e sistema online ta ademas ku por kompartí informashon aktual tokante nos isla i ku por kolektá dato di e bishitante, konforme tur legislashon i regulashon. Por ehèmpel tokante orígen di e bishitante i durashon i motibu di su bishita, loke por usa pa merkadeo dirigí den liña ku vishon di e Plan di Rekuperashon di Turismo – Tourism Recovery Plan.
Mehorashon di e produkto di Boneiru
Ku e entrada mas haltu for di e impuesto di turismo nobo proponé akí, gobièrnu por invertí den mehorashon di kalidat i sostenibilidat di e produkto turístiko di Boneiru. Na promé instante esaki ta un bentaha pa siudadanonan di Boneiru. Por usa e entrada pa promové e konekshon entre turismo i kultura lokal i ku esei posishoná Boneiru komo un isla outéntiko i úniko. Un otro meta importante ta pa invertí mas den treinen i formashon, di manera ku mas habitante por partisipá aktivamente den turismo i gana un bon entrada òf kuminsá ku un empresa.
Tarifa proponé
E tarifa proponé ta $ 50 pa persona pa aña. Pa mucha te ku 12 aña i pa habitantenan di e 5 islanan di e anterior Antia Hulandes ta apliká un tarifa mas abou di $ 10 pa persona pa aña. Aparte di esei a proponé un eksonerashon pa studiantenan boneriano ku ta studia pafó di nos isla. Pa turista krusero a proponé un tarifa di $ 10 pa persona. E kompania krusero ta paga e suma akí, meskos ku e ‘headtax’ aktual. Un mayoria grandi di e kompanianan krusero den kòmbersashon a duna di konosé ku nan ta sostené e oumento proponé.
Proseso
Den promé instante tabata e intenshon pa laga e impuesto nobo pa turista ‘stay over’ drenta na vigor entrante 1 di yanüari 2022. Despues di konsiderashon mas aleu no a alkansá e fecha akí. E fecha di implementashon ta dependiente di un akuerdo den Konseho Insular i despues di esei ainda mester di mas òf ménos 2 pa 3 luna pa implement’é bon den merkado.