Riba djamars 12 di desèmber 2023 Boneiru a yama bon biní na e promé buelo nònstòp di WestJet pa nos isla.
Riba plataforma e promé buelo a haña un kaluroso bon biní di e delegashon di Boneiru huntu ku Miss Tourism Bonaire, i despues tur e bishitantenan ku a yega a haña un regalo i un saludo ku músika lokal di parti di un ka’i òrgel i un grupo di baile den trahe folklóriko.
“Ku hopi entusiasmo nos a anhelá yegada di nos wéspetnan for di Canada, i porfin e dia tan sperá a yega ku e promé buelo di WestJest ku a baha na Boneiru”, segun Miles Mercera, direktor di Tourism Corporation Bonaire (TCB). “Canada ta keda un di nos tòp 10 merkadonan, i e konekshon nobo históriko akí ta nifiká un paso importante pa kumpli ku e deseo kresiente pa turismo na nos isla pintoresko.”
“Pa hopi tempu largu Boneiru a spera e konekshon semanal direkto akí di WestJet for di Toronto i mi ta konbensí ku e ruta akí ta bai bira un éksito grandi. E promé buelo tabata demasiado bon yená i e reservashonnan pa henter e temporada ta mustra bon. A realisá e ruta despues di un kolaborashon intensivo i bon ku e diferente partidonan na nos isla. WestJet ta ofresé un produkto hopi bunita i awor nan ta brinda biaheronan e posibilidat pa biaha tur djamars ku un buelo direkto nònstòp for di Toronto pa nos maravioso Boneiru. Prinsipalmente den lunanan di wenter mi por imaginá mi mes ku bishitantenan for di Canada tin gana di bai kaminda tin solo i disfrutá di tur kos bunita ku Boneiru tin di ofresé. Bon biní WestJet!”, segun Maarten van der Scheer, direktor di Bonaire International Airport (BIA).
Tourism Corporation Bonaire a organisá un seremonia ku e título #ItsInOurNature pa e tim di Boneiru i tripulashon di WestJet pa yama bon biní na e buelo pa nos isla.
E ruta nònstòp lo tuma lugá un biaha pa siman riba djamars ku buelo di regreso riba djárason mainta i ta kontinuá te ku 24 di aprel 2024.
Un delegashon di Boneiru, konsistiendo di entre otro Miles Mercera, direktor di TCB, Maarten van der Scheer, direktor di BIA, Veroesjka de Windt, direktor di Bonaire Hotel and Tourism Association (BONHATA), i Kia-San Silberie di Entidat Públiko Boneiru a biaha pa Toronto i tabatin un enkuentro ku e tim di WestJet riba djaluna 11 di desèmber.
Djaluna nochi tabatin un sena ku medionan di komunikashon ku TCB i su ofisina di relashonnan públiko, Diamond PR, a organisá. E sena tabata ameno i tabatin un dekorashon festivo di Pasku koló ros, inspirá pa Boneiru, di manera ku Toronto a haña un toke di Boneiru su kalor i vitalidat. Entre e presentenan tabatin profeshonalnan ‘freelance’, redaktornan di biahe, ‘content creators’ i prensa, kendenan a haña informashon tokante nos isla i e buelo nònstòp pa Boneiru ku resientemente a keda lansá.
Djamars mainta e delegashon di Boneiru, huntu ku representantenan di WestJet i aeropuerto di Toronto a tene un diskurso pa e pasaheronan ku tabata abordando e avion i a duna nan un kordial bon biní riba e buelo inougural. A klousurá e seremonia ku kòrtamentu di sinta i tur pasahero a risibí un regalo spesial di Boneiru.
