Boneiru ta sigui marka logronan importante den su sektor turístiko,
awor ku e sifranan preliminar ta mustra un kantidat rekòr di bishitante pa luna di mart 2024.
Boneiru ta anunsiá un logro históriko, na momentu ku e resultadonan preliminar ta revelá ku na
luna di mart 2024 nos isla a yama bon biní na un kantidat rekòr di 18.169 bishitante stayover.
Pa komparashon: na aña 2023 e kantidat total di bishitante tabata 16.493, miéntras ku na aña
2019 esaki tabata 16.000, loke ta nifiká un tendensia positivo pa Boneiru su turismo. Esaki ta
representá un oumento di mas òf ménos 10% entre 2023 pa 2024 i un kresementu di mas òf
ménos 13,5% entre 2019 pa 2024.
Bishitantenan for di Hulanda a keda e grupo di mas grandi, esta 39% di e total, siguí pa e
merikanonan ku 29% di e total. Kòrsou, Canada, Alemania i Aruba tambe a kontribuí
konsiderabelmente na Boneiru su sektor turístiko.
Na luna di mart 2024 Boneiru a konosé un oumento remarkabel di 37% pa loke ta trata
bishitantenan merikano, kompará ku e aña anterior i un subida supstansial di 186% pa loke ta
trata bishitantenan kanades. E oumento di e kantidat di bishitante norteamerikano ta danki na e
oumento di buelo di United Airlines, Delta, AA i e echo ku a yama bon biní na e buelo nobo di
WestJet for di Toronto, Canada. No opstante e tendensianan generalmente positivo akí, tabatin
un bahada leve di e kantidat di bishitante hulandes di 7541 na aña 2023 pa 7120 na aña 2024, loke
ta nifiká un bahada di mas òf ménos 5,6%. E bahada akí ta konsekuensia di e bahada den e
kantidat di frekuensia i asiento riba e ruta Amsterdam – Boneiru, komo konsekuensia di e kambio
di tipo di avion di parti di nos partnernan hulandes di aviashon i e kantidat di buelonan planiá.
E bishitantenan merikano a bini prinsipalmente for di New York, Florida, California, Pennsylvania
i otro estadonan grandi. E gruponan di edat ku representashon mas haltu tabata esunnan di 45
pa 54 aña (20,7%) i di 55 pa 64 aña (20,5%) loke ta indikashon di un interes fuerte di parti di e
biaheronan di edat un tiki mas haltu. E bishitantenan hulandes a bini prinsipalmente for di Noord-
Holland, Zuid-Holland i Noord-Brabant, kaminda e gruponan di edat di 55 pa 64 aña (27,6%) i di 45
pa 54 aña ta dominá.
Banda di esaki den luna di febrüari 2024 Boneiru a yama bon biní na 48.233 bishitante krusero i
23 barku krusero.
Pa estadístika i informashon mas detayá tokante Boneiru su prestashonnan turístiko, bo por
bishitá nos wèpsait ofisial riba www.bonaireisland.com òf bo por tuma kontakto ku nos via email
riba info@bonaireisland.com.